ރައްޔިތުންގެ މަޖިލީހުގެ ޖަލްސާއެއް ކުރިއަށް ދަނިކޮށް ނަމާދު ވަގުތު ޖެހިއްޖެނަމަ، އެކަން އަންގައި ދިނުމުގެ ގޮތުން މަޖިލީހުގެ ތަޅުމުގައި ބަންގީގެ އަޑު އިއްވަން ފަށައިފިއެވެ.
މަޖިލިހުގެ މިއަދުގެ ޖަލްސާގައި، ބާރަށު ދާއިރާގެ މެންބަރު އިބްރާހީމް ޝުޖާޢު ވާހަކަ ދައްކަވަމުން ދަނިކޮށް، މެންދުރު ނަމާދު ވަގުތު ޖެހުމާއެކު މައިކުގެ އަޑު ކަޑުވާލައި، ބަންގީގެ އަޑު މަޖިލީހުގެ ތަޅުމުގައި އިއްވާފައެވެ.
މިއީ މިފަދައިން މަޖިލީހުގެ ތަޅުމުގައި ކަން ކުރި ފުރަތަމަ ފަހަރެވެ. މީގެ ކުރިން ބަންގި ވަގުތުގައިވެސް މެދުކެނޑުމެއްނެތި މަޖިލީހުގެ ޖަލްސާ ކުރިއަށް ގެންދެއެވެ.
ނަމަވެސް، މަޖިލީހުގެ ރައީސް އަބްދުއްރަޙީމް އަބްދުالله ވަނީ މަޖިލީހުގެ ޖަލްސާ ކުރިއަށްދާ ވަގުތު ނަމާދު ވަގުތު ޖެހިއްޖެނަމަ މަޖިލީހުގެ ތަޅުމުގައިވެސް ބަންގީގެ އަޑު އިއްވާ ގޮތަށް ނިންމަވާފައެވެ.
މަޖިލީހުގެ ރައީސްގެ މި ނިންމެވުމާއި ގުޅިގެން، ޝުޖާއު ވަނީ އެމަނިކުފާނަށް ޝުކުރު އަދާކުރައްވާފައެވެ. އަދި މިއީ މަޖިލިސް ރައީސް އަބްދުއްރަހީމްގެ ރިޔާސަތުގައި މުހިންމު ފިޔަވަޅެއް އެޅުއްވި ދުވަހެއް ކަން ފާހަގަކޮށް މަޖިލީހުގެ ތަޅުމުގައި ބަންގީގެ އަޑު ގުގުމައިގެން ދިއުމަކީ މަޖިލިސް ރައީސް ކުރެއްވި ވަރަށް މުހިންމު ކަމެއްކަމަށް އޭނާ ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
