ސަރުކާރުން ޔޫއެންޑީޕީއާ ގުޅިގެން އެސްޓީއޯ މެދުވެރިކޮށް ޔޫރަޕުގައި ބޭނުންކުރާ ފެންވަރުގެ މޮޅު ބޭސް އެތެރެކޮށް އަގުތައް ކޮންޓްރޯލްކުރަން ފަށައިފިއެވެ.

މިއަދު މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ނެރުނު ނޫސްބަޔާނެއްގައި ބުނެފައިވާ ގޮތުގައި، ސަރުކާރުން ފަށާފައިވާ މި ޕްރޮޖެކްޓްގެ ދަށުން ޕޫލް ޕްރޮކިއުމަންޓެއްގެ ތެރެއިން ބަލްކްކޮށް ބޭސް ގަނެ ރާއްޖެ ގެނައުމަށް ވަނީ ފަށާފައެވެ.

އެ ގޮތުން، މި ސިޔާސަތުގެ ދަށުން ރާއްޖެ އެތެރެކުރުމަށް ހުއްދަ ދެނީ ޑަބްލިއު.އެޗް.އޯ ލިސްޓެޑް ނުވަތަ ސްޓްރިންޖެންޓް ރެގިއުލޭޓަރީ އޮތޯރިޓީއެއްގައި ރަޖިސްޓަރީކޮށްފައިވާ، އަދި ޔޫއެންޑީޕީއާއި އެމްއެފްޑީއޭގެ ކޮލިޓީ މިންގަނޑުތަކުން ފާސްވާ ބޭސްތަކަށް ކަމަށްވެސް އެމްއެފްޑީއޭ އިން މައުލޫމާތު ދެއެވެ. 

Advertisement

އެމްއެފްޑީއޭ އިން އިތުރަށް ހާމަ ކުރެއްވި ގޮތުގައި، ޕްރޮޖެކްޓްގެ ދަށުން ގެނެވޭ ބޭސްތަކަކީ ސީދާ ބޭސް އުފައްދާ ކުންފުނިތަކުން ގަންނަ ބޭސްތަކެވެ. މިގޮތުން، ބޭހަށް ކުރާ ޚަރަދު ކުޑަވެ، ބޭހުގެ އަގު ތިރިކުރުމަށް މަގުފަހިވާނެއެވެ.

މި ސިޔާސަތު މިއަދުން ފެށިގެން ތަންފީޒުކުރެވޭނެ ކަމަށް އެމްއެފްޑީއޭއިން ބުނެފައިވާއިރު، މި ސިޔާސަތު ތަންފީޒު ކުރަން ނިންމާފައިވަނީ ދެ މަރުޙަލާއަކަށް ބަހާލައިގެންނެވެ. އެގޮތުން މިއަދުން ފެށިގެން އެސްޓީއޯ މެދުވެރިކޮށް ހޯލްސޭލްކޮށް އަދި ރީޓެއިލްކޮށް ފުރަތަމަ ތަޢާރަފުކުރެވޭ 7 ބޭސް ލިބެން ފަށާނެއެވެ.

މި ސިޔާސަތު ތަންފީޒު ކުރަން ފެށުމާއެކު، ނަތީޖާއެއްގެ ގޮތުން އާސަންދަ ނިޒާމުގެ ތެރޭގައި ހުރި ބޮޑެތި ލީކޭޖްތައް ހުއްޓުވި، ބޭހުގެ އަގު ކޮންޓްރޯލްކުރުމަށް މަގުފަހިވާނެ ކަމަށް އެމްއެފްޑީއޭއިން ބުނެފައިވެއެވެ. އަދި ބޭހަށް ކުރަންޖެހޭ ޚަރަދު ކުޑަވެ، ސިއްޙީ ނިޒާމު ހަރުދަނާކުރެވޭނެ ކަމަށްވެސް ބުނެފައިވެއެވެ.