ރައްޔިތުން އެދެނީ ނަމާދުވަގުތަށް މަޖިލިސް މެދުކަނޑާލައި ބަންގި ގޮވައި ނަމާދުކުރަންކަމުގައި ދީނީ ދައުވަތު ފެތުރުމުގައި ރާއްޖޭގައި ފުޅާދާއިރާއެއްގައި ހަރަކާތްތެރިވާ ސަލަފް ޖަމިއްޔާގެ އޮޕަރޭޝަންސް މެނޭޖަރ ޢަލީ ރަމީޒު ވިދާޅުވެއްޖެއެވެ.
އިއްޔެގެ މެންދުރު ނަމާދު ވަގުތު ވަނުމުން މަޖިލީހުގެ ރައީސް ބަންގި އިއްވުމާ ގުޅިގެން ޢަލީރަމީޒުވަނީ އެ ވީޑިއޯކޮޅު އޭނާގެ ފޭސްބުކްގައި ޕޯސްޓުކޮށްފައެވެ. އަދި އެކަމަކީ ތާރީޚީ ކަމެއްކަމަށް ސިފަކޮށް ޢަލީ ރަމީޒު ވިދާޅުވެފައިވަނީ ރައްޔިތުންގެ މަޖިލީހުގެ މުޅިތާރީޚުގައި ވެސް ފުރަތަމަ ފަހަރަށް މަޖިލީހުގައި ބަނގީގެ އަޑު އިއްވައިފިކަމަށެވެ. އަދި ޢަލީރަމީޒުވަނީ ރައްޔިތުންގެ މަޖިލީހުގެ މެމްބަރުންނަށް ނަމާދު ކުރުމަށް އިލްތިމާސްކުރައްވާފައެވެ.
ޢަލީ ރަމީޒު އިއްޔެ ޕޯސްޓު ކުރި ވީޑިއޯކޮޅު ވަނީ 80 ހާސް މީހުން ބަލާފައެވެ. އަދި 240 މީހުން ކޮމެންޓުކޮށްފައިވާއިރު ގިނަބޭފުޅުން ވިދާޅުވެފައިވަނީ ބަނގީގެ އަޑު އިއްވިޔަސް ރަނގަޅުނޫންކަމަށާއި ނަމާދު ވަގުތު ޖެހުމުން ޖެހޭނީ ނަމާދަށް ދާން ކަމަށެވެ.
އިއްޔެ ޢަލީ ރަމީޒު ކުރެއްވި އެ ޕޯސްޓަށް ކޮމެންޓުކުރެއްވި ގިނަ ބޭފުޅުންގެ ވާހަކަތަކަށް ރިޢާޔަތްކޮށް މިއަދު ޢަލީ ރަމީޒު ކުރެއްވި ޕޯސްޓުގައި އޭނާ ވިދާޅުވެފައިވަނީ ބަންގި ވަގުތަށް މަޖިލިސް މެދުކަނޑާލައި ނަމާދަށް ދިއުމަކީ ރައްޔިތުން އެދޭ އެދުމެއް ކަމަށާއި އެ ބަދަލު ވަރަށް އަވަހަށް ފެނިގެންދާނެކަމަށް އުއްމީދު ކުރައްވާކަމަށެވެ.
"އިއްޔެގެ ބަންގި ޕޯސްޓަށް ކޮމެންޓު ކުރެއްވި ހުރިހާ ބޭފުޅުންގެވެސް އެދުމަކީ ބަނގި ގޮވީމަ ނަމާދުކުރުމަށް ރައްޔިތުންގެ މަޖިލީހުގެ ޖަލްސާތައް މެދުކަނޑާލުން. އުއްމީދު ކުރަނީ ވަރަށް އަވަހަށް އެ ބަދަލު ފެނިގެންދާނެކަމަށް. ރައްޔިތުންނަށް ރިވެތި ނަމޫނާއަކަށް ވާނެކަމަށް" ޢަލީ ރަމީޒު މިއަދު ކުރެއްވި ޕޯސްޓުގައި ވިދާޅުވެފައިވެއެވެ.
Advertisement
This content is created and paid for by advertisers and does not involve Voice Journalists
