ޗައިނާގެ އެހީއާއިއެކު، ފަލަސްޠީނުގެ ޖަމާޢަތްތަކުން "ޤައުމީ އެއްބައިވަންތަކަމުގެ" އެއްބަސްވުމެއްގައި ސޮއިކޮށްފިއެވެ.

މިއީ އިސްރާއީލުން ޣައްޒާގައި ހިންގަމުންދާ ގަތުލުއާއްމަށްފަހު ޣައްޒާގެ ބާރު ފަލަސްޠީނުގެ އަތުގައި ދެމެހެއްޓުމުގެ މަގްސަދުގައި ވެފައިވާ އެއްބަސްވުމެކެވެ.

ޗައިނާގެ ޚާރިޖީ ވަޒީރު ވާންގް ޔީ ވިދާޅުވި ގޮތުގައި، ޗައިނާގައި ތިން ދުވަހުގެ މުއްދަތަށް ކުރިއަށްދިޔަ މަޝްވަރާތަކަކަށްފަހު ސޮއިކުރެވުނު މި އެއްބަސްވުމުގައި، ހަނގުރާމައަށްފަހު ޣައްޒާ ހިންގުމަށް "ވަގުތީ ޤައުމީ އެއްބައިވަންތަކަމުގެ ސަރުކާރެއް" އުފެއްދުމުގެ އަސާސްތައް ވަނީ ކަނޑައަޅާފައެވެ.

Advertisement

މި އެއްބަސްވުމުގައި ފަލަސްތީނުގައި ދިގު މުއްދަތެއް ވަންދެން ވާދަވެރިކަން އޮތް ހަމާސްއާއި ފަތަޙް ހިމެނޭހެން ފަލަސްޠީނުގެ 14 ޖަމާޢަތަކުން ވަނީ ސޮއިކޮށްފައެވެ.

މި އެއްބަސްވުމުގައި ސޮއިކުރި ޖަމާއަތެއް ކަމަށްވާ ފަލަސްޠީން ނެޝަނަލް އިނީޝިއޭޓިވްގެ ސެކްރެޓަރީ ޖެނެރަލް މުސްޠަފާ ބަރްޣޫޘީ ވިދާޅުވީ މިއީ ފާއިތުވި އަހަރުތަކުގައި ވެފައިވާ އެހެން އެއްބަސްވުންތަކަށްވުރެ މާ ފުޅާދާއިރާއެއްގައި ވެފައިވާ އެއްބަސްވުމެއް ކަމަށެވެ.

އޭނާ ވިދާޅުވި ގޮތުގައި މި އެއްބަސްވުމުގެ މައިގަނޑު ހަތަރު ބައި ތެރޭގައި ހިމެނެނީ ވަގުތީ ޤައުމީ އެއްބައިވަންތަކަމުގެ ސަރުކާރެއް ޤާއިމުކުރުމާއި، ކުރިއަށް އޮތް އިންތިޚާބުތަކަށް ތައްޔާރުވުމުގެ ގޮތުން އެކީގައި ފަލަސްޠީންގެ ލީޑަރޝިޕެއް އުފެއްދުމާއި، އައު ފަލަސްޠީނު ނެޝަނަލް ކައުންސިލެއް މިނިވަންކަމާއެކު އިންތިޚާބުކުރުމާއިއެކު އިސްރާއީލު ހަމަލާތަކާއި ކުރިމަތިލުމަށް އެއްބައިވަންތަކަމުގެ އާންމު އިޢުލާނެއް ނެރުމެވެ.

އެއްބައިވަންތަކަމުގެ ސަރުކާރަކާ ދިމާއަށް ފަލަސްތީނުން މިސްރާބުޖެހުމަކީ ވަރަށް މުހިންމު ކަމެއްކަން ފާހަގަކުރައްވާ، މުސްޠަފާ ބަރްޣޫޘީ އިތުރަށް ވިދާޅުވީ، މީގެ ސަބަބުން ފަލަސްތީނުގެ މަސްލަހަތުތަކާ ދެކޮޅަށް އިސްރާއީލުން އޮނިގަނޑެއް އުފެއްދުމުގެ މަސައްކަތްތައް ހުއްޓުވާލެވޭނެ ކަމަށެވެ.

މި އެއްބަސްވުމުގެ ތެރެއިން، ހަމާސްއާއި ފަތަޙް އެއް ގަލަކަށް އެރުމަކީ ފަލަސްތީނުގެ އެތެރޭގެ ގުޅުންތަކަށް އެދެވޭ މުހިންމު ބަދަލެއް އަންނާނެކަމެއް ކަމަށް ތަޖުރިބާކާރުން އަންނަނީ ބުނަމުންނެވެ.

ފަލަސްތީނުގެ ސަރަހައްދުތަކުގައި މައިގަނޑު ގޮތެއްގައި ހަރަކާތްތެރިވާ މި ދެ ޖަމާއަތަކީ 2006 ވަނަ އަހަރު އުފެދުނު ހަމަނުޖެހުމަށްފަހު ވަރަށް ބޮޑަށް ވާދަވެރިވެފައިވާ ދެ ޖަމާއަތެވެ. އެ ހަމަނުޖެހުމަށްފަހު މީގެ ކުރިންވެސް އެ ދެ ޖަމާއަތް އެއްބައިވުމަށް އެއްބަސްވުމަކާއި ހަމައަށް ގެނައުމަށް މަސައްކަތް ކުރި ނަމަވެސް، އޭރު އެކަން ކާމިޔާބު ވެފައެއް ނުވެއެވެ.