ނައިޖީރިއާގައި ބްލެކްމެއިލް ކުރުމަށް ބޭނުންކުރި 63،000 އަށްވުރެ ގިނަ އިންސްޓަގްރާމް އެކައުންޓް ނައްތާލައިފިއެވެ.

މެޓާ ކުންފުނިން ބުނީ. މިއީ ޖިންސީ ގޮތުން މީހުން ބްލެކްމެއިލް ކުރުމަށް ބޭނުންކުރަމުން ދިޔަ އެކައުންޓްތަކެއް ކަމަށެވެ.

މެޓާއިން ބުނިގޮތުގައި މި އެކައުންޓްތަކުން އަމާޒުކުރަމުން ދިޔައީ އެމެރިކާގެ ފިރިހެނުންނަށެވެ. އަދި މީގެ އިތުރުން ފޭސްބުކްގެ 7،200 އެކައުންޓާއި، ޕޭޖާއި، ގްރޫޕްވެސް ނައްތާލެވުނެވެ. މިއީ މީހުން މަކަރު ހެދުމުގެ ޓިޕްސް ދެމުން ދިޔަ އެކައުންޓްތަކެކެވެ.

Advertisement

މެޓާއިން ބުނީ މި ސްކޭމްތަކުގެ ގިނަ މަސައްކަތްތައް ކާމިޔާބު ނުވިނަމަވެސް ބައެއް ކުޑަކުދިންނަށް އަމާޒުކުރެވިފައިވާ ކަމަށެވެ. އެފަދަ ކަންކަން ވަނީ އެމެރިކާގެ ނެޝަނަލް ސެންޓަރ ފޮރ މިސިންގ އެންޑް އެކްސްޕްލޮއިޓެޑް ޗިލްޑްރަންއަށް ރިޕޯޓުކޮށްފައެވެ.

މި މައުލޫމާތު ހާމަކުރީ މިފަދަ ސްކޭމްތަކާ މެދު ހޭލުންތެރިކަން އިތުރުކުރުމަށްކަމަށް މެޓާއިން ބުންޏެވެ.

މިފަދަ ސްކޭމްތައް ހިންގަމުންދާ "ޔާހޫ ބޯއިސް" ގެ ނަމުން މަޝްހޫރު ނައިޖީރިއާގެ އޮންލައިން މަކަރުވެރިން ވަނީ އެކި ބާވަތުގެ ސްކޭމްތައް ހިންގާފައެވެ. ނައިޖީރިއާގެ އިގްތިސާދީ ދަތިތަކުގެ ސަބަބުން މިފަދަ ސްކޭމްތައް އިތުރުވެފައިވާކަމަށް ބެލެވެއެވެ.

މެޓާއިން ބުނީ ބައެއް އެކައުންޓްތަކުން ސްކޭމް ހިންގުމަށް ބޭނުންވާ ސްކްރިޕްޓާއި، ގައިޑާއި، ފޮޓޯ ކަލެކްޝަންތައް ވިއްކަމުންދިޔަ ކަމަށެވެ.

އޮންލައިން މާހައުލުގައި ކުދިން ރައްކާތެރިކުރުމަށް އެކަށީގެންވާ މަސައްކަތް ނުކުރާކަމުގެ ފާޑުކިޔުން މެޓާއަށް ކުރިމަތިވެފައިވާއިރު، މި ފަދަ "ސެކްސްޓޯޝަން" ސްކޭމްތަކުގައި އާންމުކޮށް ހިމެނެނީ ޝިކާރައަކަށްވާ ފަރާތާ އޮންލައިންކޮށް ގުޅުމެއް އުފައްދައި، އެ ފަރާތުގެ ޖިންސީ ފޮޓޯ ނުވަތަ ވީޑިއޯ ހޯދުމަށްފަހު، އެ ތަކެތި ހާމަކޮށްލާނެ ކަމަށް ބުނެ ބްލެކްމެއިލްކޮށް ފައިސާ ހޯދުމެވެ.