އިސްރާއީލުގެ އަނިޔާވެރި ބޮޑުވަޒީރު ބެންޖަމިން ނަތަންޔާހޫ އެމެރިކާގެ ކޮންގްރެސްގައި ދެއްކި ވާހަކަތަކުން ޔަހޫދީން ޣައްޒާގައި ހިންގަމުންދާ ގަތުލުއާއްމު ހުއްޓާލަން ބޭނުންނުވާކަން ހާމަވާކަމަށް ހަމާސްގެ އިސް އޮފިޝަލެއް ކަމުގައިވާ ސާމީ އަބޫ ޒުހްރީ ވިދާޅުވެއްޖެއެވެ.

އެމެރިކާގެ ކޮންގްރެސްގައި ސެނެޓާއި ހައުސް އޮފް ރެޕްރެޒެންޓޭޓިވްސްގެ ޖޮއިންޓް މީޓިންގއެއްގައި ވާހަކަދައްމުން ނަތަންޔާހޫ ވަނީ މެދުއިރުމަތީގައި އީރާނާ ދެކޮޅަށް ސެކިއުރިޓީ އެލައިއަންސްއެއް އުފެއްދުމުގެ މުހިންމުކަމަށް ބުނެފައެވެ.

ނަތަންޔާހޫ ވަނީ ޣައްޒާގައި ޔަހޫދީން ވަޒަންވެރި ކުރާކަމަށް ދެކޮޅުހަދައި، ޣައްޒާގެ ގަތުލުއާއްމު ނިމުމަށްފަހު ޣައްޒާގައި ވެރިކަން ކުރަންވާނީ އިސްރާއީލާއި ދެކޮޅުނުވާ ބައެއްކަމަށް ބުނެފައެވެ.

Advertisement

މި ވާހަކަތަކާއި ގުޅިގެން އަބޫ ޒުހްރީ އިންޓަވިއުއެއްގައި ވިދާޅުވީ، ނަތަންޔާހޫ ދެއްކި ވާހަކަތަކަކީ ދޮގުތަކެއް ކަމަށާއި، އެ ވާހަކަތަކުން އެމީހުން ފެއިލްވަމުންދާ ދިޔުމާއި، ޣައްޒާގެ ނަސްލު ނައްތާލުމަށް ހިންގަމުންދާ އަމަލުތަށް ނުފޮރުވޭނެ ކަމަށެވެ. 

އެއްވެސް ފަރާތަކުން ނަތަންޔާހޫ ބޭނުންވާހެން އިސްރާއީލާއެކު އެލައިއަންސްއެއް އުފެއްދުމަކީ ޣައްޒާގެ ޝަހީދުންގެ ލެޔަށް ޚިޔާނާތްތެރިވުން ފަދަ ކަމެއްގެ ގޮތުގައި އަބޫ ޒުހްރީ ސިފަކުރެއްވިއެވެ.

އަބޫ ޒުހްރީގެ އިތުރުން، ނަތަންޔާހޫގެ ވާހަކަތަކަށް ރައްދު ދެއްވައި، ފަލަސްތީނުގެ ރައީސްގެ ސްޕޯކްސްޕަރސަން ނަބީލް އަބޫ ރުދައިނާ ވެސް ވަނީ ފަލަސްތީނުގައި ވެރިކަން ކުރާނީ ކާކުތޯ ނިންމާނީ ހަމައެކަނި ފަލަސްތީނުގެ ރައްޔިތުންކަމަށް ވިދާޅުވެފައެވެ. އަދި މީގެ އިތުރުންވެސް ސަލާމަތާއި ހަމަޖެހުން ހާސިލުކުރުމަށް އޮތް ހަމައެކަނި ހައްލަކީ އިރުމަތީ ގުދުސް އަކީ ފަލަސްތީނުގެ ވެރިރަށްކަމަށް ބަލައި، ފަލަސްތީނުގައި މިނިވަން ދައުލަތެއް ގާއިމުކުރުން ކަމަށް ވެސް ނަބީލް އަބޫ ރުދައިނާ ވިދާޅުވިއެވެ.