ޗައިނާގެ ސައިބަރ ހެކަރުންގެ ގްރޫޕެއް ކަމަށްވާ ޑެގަރފްލައި އިން މެކްއޯއެސް ބޭނުންކުރާ ފަރާތްތަކަށް އަމާޒުކޮށް އަޕްޑޭޓްކޮށްފައިވާ މެކްމާ މެލްވެއަރ އެއް ތަޢާރަފުކޮށްފިއެވެ. މި މެލްވެއަރ އަކީ 2019 ވަނަ އަހަރުން ފެށިގެން ބޭނުންކުރަމުން އަންނަ މެކްއޯއެސް ބެކްޑޯ އެކެވެ.
މި މެލްވެއަރ ގައި ޑިވައިސް ފިންގަރޕްރިންޓިންގ، ކޮމާންޑް އެގްޒެކިއުޝަން، ސްކްރީން ގްރެބިންގ، ކީލޮގިންގ، އޯޑިއޯ ކެޕްޗަރ އަދި ފައިލް ޓްރާންސްފަރ ފަދަ ގިނަ ގުނަ ޤާބިލިއްޔަތުތަކެއް ހިމެނެއެވެ. އެންމެ ފަހުގެ ވަރޝަންތަކުގައި މި ޤާބިލިއްޔަތުތައް އިތުރަށް ތަރައްޤީކޮށްފައިވާކަން ފާހަގަކުރެވެއެވެ.
ޑެގަރފްލައި އިން މި މެލްވެއަރ ބޭނުންކޮށްފައިވަނީ ޓައިވާނުގެ ޖަމިއްޔާތަކަކާއި ޗައިނާގައި ހަރަކާތްތެރިވާ އެމެރިކާގެ އެންޖީއޯ ތަކަށް އަމާޒުކޮށެވެ. މީގެ އިތުރުން، މި ގްރޫޕުން ވަނީ އަޕާޗީ އެޗްޓީޓީޕީ ސަރވަރ ގެ ސެކިއުރިޓީ ހުސްކަމެއް ބޭނުންކޮށްގެން އެމްޖީބޮޓް މެލްވެއަރ އެއްވެސް ޑިޕްލޯއި ކޮށްފައެވެ.
މި ހަމަލާތަކުގައި މެކްމާ އާއި އެމްޖީބޮޓް އާއެކު ވިންޑޯސް ބެކްޑޯ އެއް ކަމަށްވާ ޓްރޯޖަން.ސުޒަފްކް ވެސް ބޭނުންކޮށްފައިވެއެވެ. މި ބެކްޑޯ އަކީ ޓީސީޕީ ނުވަތަ ވަންޑްރައިވް މެދުވެރިކޮށް ކޮމާންޑް ކޮށް އަދި ކޮންޓްރޯލް ކުރެވޭ މަލްޓި-ސްޓޭޖްޑް ބެކްޑޯ އެކެވެ.
ސިމެންޓެކްގެ ރިސާޗަރުން ދެކޭގޮތުގައި މި އާ މެކްމާ ވެރިއަންޓް ތަޢާރަފުކުރި ސަބަބަކީ ކުރީގެ ވަރޝަންތައް ހާމަވެ، ފަސޭހައިން ދެނެގަނެވޭތީއެވެ. މީގެ ކުރިން މި ހެކަރުން ވަނީ ހޮންގ ކޮންގުގެ ވެބްސައިޓްތަކަށް ނުފޫޒު ފޯރުވައިގެން ވޯޓަރިންގ ހޯލް ހަމަލާތައް ދީފައެވެ.
ސިމެންޓެކް ރިސާޗަރުން ބުނީ މި މެލްވެއަރ އިން ސަލާމަތްވުމަށް ވަރަށް ގިނަ ގޮންޖެހުންތަކާ ކުރިމަތިވެފައިވާ ކަމަށާއި، މީގެ ސަބަބުން ޔޫޒަރުންގެ ޒާތީ މައުލޫމާތުތަކަށް ހެކަރުން ފަސޭހައިން ވަދެވިދާނެކަމަށެވެ. އޭގެ ތެރޭގައި ބޭންކް އެކައުންޓްތަކާއި، އީމެއިލްގެ ޕާސްވޯޑްތައް ފަދަ މުހިންމު މައުލޫމާތުތައް ވަގަށްނެގިދާނެކަމަށް އެކުންފުނިންވަނީ އިންޒާރު ދީފައެވެ.
Advertisement
This content is created and paid for by advertisers and does not involve Voice Journalists
