އެމެރިކާގެ ނައިބްރައީސް ކަމަލާ ހެރިސްގެ ފޭކް ވީޑިއޯއެއް އީލޮން މަސްކް އެކްސްގައި ޝެއަރކޮށްފިއެވެ.
ސްޕޭސްއެކްސް އަދި ޓެސްލާގެ ސީއީއޯ އީލޮން މަސްކް އޭނާގެ އަމިއްލަ ސޯޝަލް މީޑިއާ ޕްލެޓްފޯމް އެކްސްގައި މިވީޑިއޯ ޝެއާކޮށްފައިވާއިރު، ކަމަލާ ހެރިސްގެ ކެމްޕޭން މި ވީޑިއޯއަކީ އޮޅުވާލައިގެން ހަދާފައިވާ ވާރޝަނެއް ކަމެއް މަސްކް ފާހަގަ ކޮށްފައެއް ނުވެއެވެ. އެކަމަކު މި ވީޑިއޯގައި ހެރިސްގެ އަޑު ބޭނުންކޮށްގެން އޭނާ ނުބުނާ ވާހަކަތަކެއް ހިމަނާފައިވާއިރު، މިއީ ކަނޑައެޅިގެން އޮޅުވާލައިގެން ހަދާފައިވާ ވީޑިއޯއެއްކަން ގިނަބަޔަކުވަނީ ފާހަގަ ކޮށްފައެވެ.
ނިއު ޔޯކް ޓައިމްސްއިން ފާހަގަކޮށްފައިވާ ގޮތުގައި މަސްކް މި ވީޑިއޯ ޝެއަރކޮށްފައިވަނީ ހުކުރު ދުވަހުގެ ރޭގައެވެ. މި ވީޑިއޯގައި ހެރިސްގެ އަޑުން ބުނެފައިވަނީ އޭނާ ވައިސް ޕްރެޒިޑެންޓްކަމަށް ހޮވުނީ "އަލްޓިމޭޓް ޑައިވަރސިޓީ ހަޔަރ" އެއްގެ ގޮތުގައި ކަމަށެވެ. މީގެ އިތުރުން ވީޑިއޯގައި ބުނެފައިވަނީ ހެރިސް ވަނީ "އަލްޓިމޭޓް ޑީޕް ސްޓޭޓް ޕަޕެޓް" ކަމަށްވާ ޖޯ ބައިޑެންގެ ދަށުން ހަތަރު އަހަރު ހޭދަކޮށްފައި ކަމަށެވެ.
އެކްސްގެ ޕޮލިސީތަކުގެ ދަށުން މީހުންނަށް އޮޅުވާލުމަށް ނުވަތަ އޮޅުން އަރާފަދަ ގޮތަކަށް ހަދާފައިވާ މީޑިއާ ޝެއަރކުރުމަކީ މަނާކަމެކެވެ. ނަމަވެސް މަސްކްގެ ޕޯސްޓްގައި މިއީ އޮޅުވާލައިގެން ހަދާފައިވާ ވީޑިއޯއެއްކަން ބަޔާންކޮށްފައި ނުވާއިރު، އެކްސްއިން މި ޕޯސްޓް ފާހަގަކޮށް އެއްވެސް ފިޔަވަޅެއް އަޅާފައެއް ނުވެއެވެ.
މި ވީޑިއޯ އެކްސްގައި މިހާތަނަށް 119 މިލިއަނަށްވުރެ ގިނަ ފަހަރު ބަލާފައިވާއިރު، މިއީ އަސްލު ނޫން ވީޑިއޯއެއްކަން ބަޔާންކުރާ ކޮމިއުނިޓީ ނޯޓްސްއެއްވެސް އަދި އިތުރުކޮށްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
