ކުރީ ސަރުކާރުން ގެނދޮރުވެރިޔާ ސްކީމްގެ ދަށުން ދޫކުރަން ނިންމި 4000 ފްލެޓް ލިބޭ މީހުންގެ ލިސްޓު ރިވިޔުކޮށް، އަންނަ އޮކްޓޯބަރު މަހުގައި އާންމުކުރައްވާނެ ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެ އެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ހިންގި ގެދޮރުވެރިޔާ ސްކީމުގެ ދަށުން ދޫކުރި 4000 ފްލެޓް ލިބޭ މީހުންގެ ލިސްޓު ބާތިލު ނުކުރުމަށް އެދި މަޖިލީހަށް ޕެޓިޝަނެއް ހުށަހަޅާފައިވާއިރު، އެ ކަމާއި ގުޅިގެން ޖަވާބުދާރީ ވުމަށް މިނިސްޓަރ ހައިދަރު މިއަދު ވަނީ މަޖިލީހުގެ ޕެޓިޝަން ކޮމިޓީއަށް ހާޒިރު ކޮށްފައެވެ.
ކޮމިޓީގައި ވާހަކަދައްކަވަމުން ހައިދަރު ވިދާޅުވީ ފްލެޓް ލިސްޓް އުވާލަން ގަސްދުނުކުރައްވާ ކަމަށެވެ. އެހެންނަމަވެސް، ފުލެޓްތައް އޭގެ ހައްގުވެރިންނަށް ލިބޭކަން ޔަގީން ކުރެއްވުމުގެ މަސައްކަތް ކުރައްވާ ކަމަށެވެ. އަދި އެ ފްލެޓްތައް އިމާރާތްކުރުމުގެ މަސައްކަތް ނިމެންވާއިރަށް ފައިނަލް ލިސްޓު އާންމުކުރައްވާނެ ކަމަށްވެސް މިނިސްޓަރ ވިދާޅުވިއެވެ.
“ފްލެޓްތައް އިމާރާތްކޮށް ނިމެންވާއިރަށް އަޅުގަނޑުމެން ހުރިހާ، ހޮވޭ ފަރާތްތައް އިއުލާންކޮށް ފައިނަލް ލިސްޓު ގެޒެޓް ކުރާނަން، އަޅުގަނޑަށް އެނގިފައި އޮތް ގޮތުގައި 32 ޓަވަރުގެ ތެރެއިން އެންމެ ފުރަތަމަ ހަ ޓަވަރު ނިމޭނީ އޮކްޓޯބަރު މަސް ނިމޭހާ ތަނުގައި. އިރާދަކުރެއްވިއްޔާ އެހާތަނަށް އަޅުގަނޑުމެން ފައިނަލް ލިސްޓު އާންމު ކުރާނަން.“
ހައުސިން މިނިސްޓަރު ޑރ. އަލީ ހައިދަރު
މިއާއެކު މިނިސްޓަރު ވިދާޅުވީ އެއްވެސް ޝައްކަތެއް ނެތް މިންވަރަށް ޝަރުތުތައް ހަމަވާނަމަ އެ މީހެއްގެ ނަން ފައިނަލް ލިސްޓުގައި ހިމެނޭނެ ކަމަށެވެ. އަދި ޝަރުތު ހަމަވޭތޯ ބެލުމުގެ ކަންކަންވެސް އިންސާފުވެރިކޮށް ކުރިއަށް ގެންދަވާނެ ކަމަށެވެ.
Advertisement
This content is created and paid for by advertisers and does not involve Voice Journalists
