ފަލަސްޠީނުގެ ރައްޔިތުންނަށް އެހީތެރިވުމަށް ތުރުކީން އިސްރާއީލަށް އަރާފާނެކަމުގެ އިޝާރާތެއް ތުރުކީގެ ރައީސް ރަޖަބް ޠައްޔިބް އުރްދުޣާން ދެއްވައިފިއެވެ.

އުރްދުޣާން މިފަދައިން ވިދާޅުވީ، އެމަނިކުފާނުގެ އުފަން އަވަށް ކަމުގައިވާ ރީޒޭގައި ބޭއްވުނު އެގައުމުގެ ވެރިކަން ކުރާ ޕާޓީ، އޭކޭ ޕާޓީގެ ބައްދަލުވުމެއްގަައި ވާހަކަފުޅު ދައްކަވަމުންނެވެ.

އުރްދުޣާން ވިދާޅުވީ، އިސްރާއީލަށް ފަލަސްތީނަށް އަނިޔާވެރިކަމާއި އެކު އަމަލު ނުކުރެވޭނެ ކަމަށާއި، މިކަމުގައި ވަރުގަދަ ވާން ޖެހޭ ކަމަށެވެ. 

Advertisement

މިގޮތުން 2020 ވަނަ އަހަރު، އދން ބަލައިގަނެފައިވާ ލީބިޔާގެ އައު ސަރުކާރަށް ޙިމާޔަތް ދިނުމަށް ހިންގި އޮޕަރޭޝަނެއްގެ ދަށުން ތުރުކީގެ ސިފައިން ފޮނުވާފައިވާއިރު، ދާލިކް-ކަރަބާގައި އަޒަރްބައިޖާނުން ހިންގަމުންދާ އަސްކަރީ ޙަރަކާތަށްވެސް ހަތިޔާރު ފޯރުކޮށްދިނުން ފަދަ އެހީތައް ފާހަގަކުރައްވަމުން އުރްދުޣާން ވިދާޅުވީ، މިފަދައިން ފަލަސްތީނު ހިމާޔަތްކުރުމަށްޓަކައި އަމަލު ކުރެވިދާނެ ކަމަށެވެ.

ފަލަސްތީނުގެ މުސްލިމުންނަށް އަމާޒުކޮށް ޔަހުދީން ހިންގަމުންދާ ގަތުލުއާއްމާއި ގުޅިގެން އަބަދުވެސް އިސްރާއީލަށް ފާޑުކިޔުއްވާ އުރްދުޣާން ގެ މި އިންޒާރު އައިސްފައިމިވަނީ ޣައްޒާގައި ޔަހޫދީން ހިންގަމުންދާ ލާއިންސާނީ އުދުވާން ހުއްޓުވުމާއި ގުޅޭ ގޮތުން މަޝްވަރާ ކުރަމުން އަންނަ ދަނޑިވަޅެއްގައިކަން ފާހަގަކޮށްލަން ޖެހެއެވެ.