މިއަދުގެ ރައްޔިތުންގެ މަޖިލީހުގެ ޖަލްސާގައި، އަންހެނުންނަށް ނިސްބަތްކޮށް، އިހްތިރާމް ކުޑަވާފަދަ އިބާރާތުން ވާހަކަ ދެއްކެވުމުން ހުޅުމާލެ އުތުރު ދާއިރާގެ މެންބަރު ހުސެއިން ޝަރީފަށް ގިނަ ބައެއްގެ ފާޑުކިޔުން އަމާޒުވެއްޖެ އެވެ.
މިއަދު މަޖިލީހުގެ ޖަލްސާގައި ސަރުކާރުގެ ފަރާތުން ކުޅުދުއްފުށި އުތުރު ދާއިރާގެ މެންބަރު މުޙައްމަދު ދާއޫދު ހުށަހަޅުއްވާފައިވާ،ވަޒީފާއާބެހޭ ޤާނޫނު އަށް އިސްލާހު ގެނައުމުގެ ބިލުގެ އިބްތިދާއީ ބަހުސްގެ ތެރެއިން މެންބަރު މުސައިން ވަނީ ގަވާއިދާއި ހިލާފަށް އުޅޭ ބިދޭސީން ހުރިހާ ކަމެއްގެ ކޮންޓްރޯލް ނަގަމުންދާކަން ފާހަގަކުރައްވާފައެވެ.
މިފަދައިން ބިލަށް ބަހުސް ކުރައްވަމުން މެންބަރު ވިދާޅުވީ، ކައްކަން ވަންނަ ހިސާބަށް ވެސް ބިދޭސީން ގޮސްފިކަމަށާއި، ފިރިމީހާއަށް ކާއެތިކޮޅު ދެނީވެސް ބިދޭސީއެއްކަމަށާއި، އަނބިމީހާ އޮންނަނީ ގޭގައި ކަސޯޓީ ބަލަން ކަމަށެވެ.
"އަޅުގަނޑުމެން ގޭގަ ކައްކާ ކާ އެތިކޮޅު އަޅުގަނޑުމެންނަށް ފޯރުކޮށްދޭން ޖެހޭ އަނބި މީހާގެ ބަދަލުގަ މިހާރު ހުރީ ބިދޭސީއެއް. އަނބި މީހާ އޮންނަނީ ގޭގަ ދެފައި ދަމާ، އޭނަ އޮންނަނީ ރީތިކޮށް ކަސޯޓީއެއް ނޫނީ ކޮންމެސް އެހެން އެއްޗެއް ބަލަން. އަޅުގަނޑުމެންގެ ފިރިމީހާ ގެއަށްދާއިރުގަ ފިރިމީހާ އަށް ކާއެތިކޮޅު ފޯރުކޮށްދޭން ހުންނަނީ ވެސް ބިދޭސީއެއް. އަދި ކޮންތާކު މީގަ މަޖާ ތަންކޮޅަކީ ހުންނަނީ ވެސް ބިދޭސީ ފިރިހެނެއް. ކައްކަން ވެސް މިހާރު ވަންނަ ހިސާބަށް ހިނގައްޖެ"
މެންބަރު ހުސައިން ވިދާޅުވިއެވެ.
މިބީދައިން މެންބަރު ހުސައިން ވާހަކަ ދެއްކެވުމާއިއެކު، ސޯޝަލް މީޑިއާގައި އެތައް ބަޔަކު އަންނަނީ މެންބަރަށް ފާޑުކިޔަމުންނެވެ. މިގޮތުން، އަންހެނުންނަކީ ހަމައެކަނި ފިރިހެނުންނަށް ކައްކައި ކާންދީ ގޭތެރޭ މަސައްކަތް ކުރަން ތިބި ބައެއްގެ ގޮތުގައި މިވާހަކަތަކުން ދޭހަވާ ކަމަށެވެ.
ހަމައެއާއިއެކު، ކައްކާފައި ކާންދިނުމަކީ ހަމައެކަނި އަންހެނުން ކުރަން ޖެހޭ ކަމެއް ނޫންކަމަށް ވެސް ގިނަ ބަޔަކު އަންނަނީ ބުނަމުންނެވެ.
Advertisement
This content is created and paid for by advertisers and does not involve Voice Journalists
