މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު ކަމަށް ފިނޭންސް މިނިސްޓަރުގެ އެޑްވައިޒަރު އަހުމަދު މުނައްވަރު އައްޔަންކުރަން ރައްޔިތުންގެ މަޖިލީހުން ރުހުންދީފިއެވެ.

މުނައްވަރު މިމަގާމަށް އައްޔަނުކުރުމަށް ރުހުން ލިބިފައިވަނީ މިއަދުގެ ޖަލްސާގައި އެކަމާ މެދު ގޮތެއް ނިންމަން ނެގި ވޯޓުގައި ބައިވެރިވެވަޑައިގެންނެވި 78 މެންބަރުންގެ އިއްތިފާގުންނެވެ.

މާލިއްޔަތު ކޮމިޓީން އިއްޔެ މުނައްވަރު ގަވަރުނަރު ކަމަށް އައްޔަނުކުރަން ރުހުން ދިންއިރު، އިއްޔެ އެ ކޮމިޓުގެ ބައްދަލުވުމުގައި މާލިއްޔަތު ކޮމިޓީގެ މެމްބަރުން މުނައްވަރާއި އިންޓަވިއު ކުރެއްވުމަށްފަހު އެވްރެޖް 94.73 އިންސައްތަ މާކްސް ވަނީ ދެއްވާފައެވެ. އެބޭފުޅާ އަކީ ގަވަރުނަރު ކަމަށް ގާބިލު ބޭފުޅެއް ކަމަށްވާތީ އެމްއެމްއޭގެ ގަވަރުނަރަކަށް ކަނޑައެޅުއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒަށް ލަފާ އެރުވުމަށް ކޮމިޓީން ވަނީ ފާސްކޮށްފައެވެ.

Advertisement

މަޖިލީހުގެ ލަފާގެ މަތިން އެ މަގާމުގައި ކުރިން ހުންނެވި ޢަލީ ޙާޝިމް އެމަޤާމުން ވަކިކުރެއްވުމަށްފަހު، ގަވަރުނަރު ކަމަށް މުނައްވަރު އައްޔަނު ކުރުމަށް ރައީސް ޑރ.މުޢިއްޒު މަޖިލީހަށް ފޮނުއްވެވީ މިދިޔަ ހަފުތާގެ ހޯމަ ދުވަހުއެވެ.

އެއާއިއެކު، މަޖިލީހުން އެ މައްސަލަ އިތުރަށް ދިރާސާކުރުމަށް މާލިއްޔަތު ކޮމެޓީއަށް މިދިޔަ ހަފްތާގެ އަންގާރަ ދުވަހު ފޮނުވިއިރު، މުނައްވަރު އެމަގާމަށް އައްޔަނުކުރުމާއިމެދު އާއްމުންގެ ހިޔާލު ހޯދުމަށްވެސް ރައްޔިތުންގެ މަޖިލީހުން ހުޅުވާލިއެވެ.

ގަވަރުނަރުގެ މަގާމުގައި ކުރިން ހުންނެވި ހާޝިމް އެ މަގާމުން ވަކިކޮށްފައިވަނީ ރައްޔިތުން މަޖިލީހުގެ މަޝްވަރާއާއިއެކު، މި މަހުގެ 22 ވަނަ ދުވަހުއެވެ.

ހާޝިމް މަގާމުން ވަކިކުރުމަށް މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް ހުށަހެޅުއްވީ، ގަވަރުނަރުގެ މައްޗަށް ޤާނޫނުން ލާޒިމުކުރާ ޒިންމާތައް އޭގެ އެންމެ އެދެވޭ ގޮތުގައި އަދާކުރަމުންދާތަން ނުފެންނަ ކަމަށް ވިދާޅުވެއެވެ.