ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރުސީއެމް) ގެ މެމްބަރުކަމަށް އިލެކްޝަން ކޮމިޝަން (އީސީ) ގެ ކުރީގެ ނައިބު ރައީސް އިސްމާއީލް ހަބީބް އައްޔަންކުރަން ފެންނަކަމަށް ރައްޔިތުންގެ މަޖިލީހުގެ ހިއުމަން ރައިޓްސް ކޮމެޓީން ފާސްކޮށްފިއެވެ.
އެޗްއާރްސީއެމްގެ ހުސްވެފައިވާ މެންބަރުކަމަށް ހަބީބް އައްޔަނުކުރުމަށް ރައީސުލްޖުމްހޫރިއްޔާ މަޖިލީހަށް ނަން ފޮނުވާފައިވާއިރު، ހިއުމަން ރައިޓްސް ކޮމެޓީން އިއްޔެ ވަނީ ހަބީބާއި އިންޓަވިއުކޮށްފައެވެ.
އެއާއިއެކު، މިއަދު އޮތް އެ ކޮމިޓީގެ ބައްދަލުވުމުގައި އިއްޔެގެ ރިޕޯޓު ފާސްކޮށް މަޖިލީހުގެ ތަޅުމަށް ފޮނުވުމަށް ވޯޓަށް ވަނީ އަހާފައެވެ.
ކޮމެޓީގައި ވާހަކަ ދައްކަވަމުން މުގައްރިރު ނިލަންދޫ ދާއިރާގެ މެންބަރު ފާތިމަތު ސައުދާ ވިދާޅުވީ ކޮމެޓީން ހަބީބް އާއި އިންޓަވިއުކުރުމަށްފަހު އާއްމު ކޮމެޓީން ފާސްކޮށްފައިވާ މިންގަޑުގައިވާގޮތުގެ މަތިން މެންބަރުން ދެއްވާފައިވާ މާކްސްތަކުގެ އެވްރެޖް 75 އިންސައްތައަށްވުރެ މަތިން އޭނާ އަށް ލިބިފައިވާކަމަށެވެ.
އެހެންކަމުން ހަބީބަކީ އެޗްއާރްސީއެމެގް މެންބަރުކަމުގެ މަސްއޫލިއްޔަތު އަދާކުރުމަށް ގާބިލް ފަރާތެއްކަމަށް ކަނޑައަޅާ އެފަރާތް އެޗްއާރްސީއެމްގެ މެންބަރުކަމަށް އައްޔަނުކުރުމަށް ފެންނަ ކަމަށް ވޯޓް ދިނުމަށް ހުޅުވާލުމުން، ކޮމިޓީގެ ބައްދަލުވުމުގައި ތިބި ހުރިހާ މެމްބަރުންވެސް ވަނީ ފެންނަ ކަމަށް ވޯޓް ދެއްވާފައެވެ.
އީސީ އަށް ޚިދުމަތްކުރާތާ، 21 އަހަރަށްފަހު އެކޮމިޝަނުން މިއަހަރުގެ މާޗު މަހު ހަބީބް ވަކިވެވަޑައިގަތީ ކޮމިޝަންގެ މެމްބަރު ކަމުގައި ދެ ދައުރު ހަމަވުމުންނެވެ. ގާނޫނުގައި އޮންނަ ގޮތުން، އީސީގެ މެންބަރު ކަމުގައި ފުރިހަމަ ކުރެވޭނީ ގިނަވެގެން ދެ ދައުރުކަމަށްވާއިރު، ހަބީބު ވަނީ ފަސް އަހަރުގެ ދެ ދައުރު ފުރިހަމަ ކުރައްވާފައެވެ.
Advertisement
This content is created and paid for by advertisers and does not involve Voice Journalists
