ފަލަސްޠީނުގެ މިނިވަންކަމަށްޓަކައި ޖިހާދު ކުރަމުންދާ ޙަމާސް ޖަމާޢަތުގެ ސިޔާސީ ގޮފީގެ އިސްވެރިޔާ އިސްމާއީލް ހަނިއްޔާ އަވަހާރަކޮށްލަން ޔަހޫދީން އީރާނުގެ ވެރިރަށް ތެހެރާން އަށް ދިން ހަމަލާގެ ބަދަލު ހިފާނެ ކަމަށް އީރާނުގެ އައު ރައީސް މަސްއޫދު ޕެޒެޝްކިއަން ވިދާޅުވެއްޖެއެވެ.

ޕެޒެޝްކިއަން މިފަދައިން ވިދާޅުވީ، އެމަނިކުފާނުގެ ވެރިކަމުގެ ހުވާ ކުރެއްވުމުގެ ރަސްމިއްޔާތަށް ހަނިއްޔާ އީރާނަށް ކުރެއްވި ދަތުރުފުޅުގައި ޔަހޫދީން ހަމަލާދީ ހަނިއްޔާ އަވަހާރަކޮށްލުމާއި ގުޅިގެން އެކްސްގައި ކުރެއްވި ޕޯސްޓެއްގައެވެ.

މިގޮތުން ޕެޒެޝްކިއަން ވިދާޅުވީ، އީރާނުން އެގައުމުގެ ސަރަޙައްދީ އެއްބައިވަންތަކަމާއި ޝަރަފު ދިފާއު ކުރާނެ ކަމަށާއި، ޓެރަރިސްޓުންގެ މި ހަމަލާ އާއި މެދު ހިތާމަ ކުރަން ޖެހޭނެކަން ޔަގީން ކުރާނެ ކަމަށެވެ.

Advertisement

ހަނިއްޔާ އަށް ތައުރީފް ކުރައްވައި ޕެޒެޝްކިއަން ކުރެއްވި ޕޯސްޓްގައި ވިދާޅުވީ، ހަނިއްޔާ އަކީ ހިތްވަރުގަދަ ބޭފުޅެއް ކަމަށާއި، އެ ބޭފުޅާ އަވަހާރަވުމުގެ ހިތާމައިގައި އީރާނުން ބައިވެރިވާ ކަމަށެވެ. 

އީރާނާއި ފަލަސްތީނާއި ދެމެދު އޮންނަ ގުޅުން އިހުނަށްވުރެ ވަރުގަދަވާނެ ކަން ފާހަގަކުރައްވަމުން ޕެޒެޝްކިއަން ވިދާޅުވީ، އަނިޔާވެރިންގެ ދިފާއުގައި ކުރަމުންދާ މަސައްކަތް ކުރިއަށްވުރެ ވަރުގަދަވާނެ ކަމަށެވެ.

ހަނިއްޔާ އަވަހާރަވުމުގެ ކުރިން އެބޭފުޅާ އީރާނަށް ކުރެއްވި ދަތުރުފުޅުގެ ތެރެއިން، ޕެޒެޝްކިއަން އާއި ބައްދަލުކުރައްވައި މުހިންމު މަޝްވަރާތަކެއް ކުރެއްވިކަން ވެސް ފާހަގަކޮށްލަން ޖެހެއެވެ.

ހަނިއްޔާ އަވަހާރަވެފައިވާކަން ހަމާސް އިން ކަށަވަރުކޮށްދީފައިވަނީ މިއަދުގެ ހެނދުނުގެ ވަގުތެއްގައެވެ. މިހަމަލާގައި ހަނިއްޔާގެ ބޮޑީގާޑަކު ވެސް މަރުވެފައިވާއިރު، ހަމާސް އިން ބުނީ، މި ހަމަލާދީފައިވަނީ ތެހެރާނުގައި ހުންނަވާ ހަނިއްޔާގެ ގެކޮޅަށް އަމާޒުކޮށް ވައިގެ މަގުން ކަމަށެވެ.

ހަމައެއާއިއެކު، ހަމާސްއިން ބުނީ، ހަނިއްޔާ އަށް އަމާޒުކޮށް ދިން މި ނިރުބަވެރި ހަމަލާއަކީ ޔަހޫދީން ހިންގި ވަރަށް "ފިނޑި" އަމަލެއް ކަމަށާއި އެކަމުގެ ބަދަލު ލުއިކޮށް ނުނަގާނެ ކަމަށެވެ. އަދި އެކަމުގައި ހިމެނޭ ޔަހޫދީންނަށް ވަރުގަދަ ހަމަލާތަކެއް ދޭނެ ކަމުގެ އިންޒާރުވެސް ހަމާސްއިން ވަނީ ދީފައެވެ.

މި ހަމަލާގެ ތަހުގީގު އީރާނުން ފަށާފައިވާއިރު، މިކަމާއި ގުޅޭ މާބޮޑު ތަފްސީލެއް އެއްވެސް ފަރާތަކުން މިހާތަނަށް ހާމަކޮށްފައެއް ނުވެއެވެ.