ވިލިމާލޭގައި ޤާއިމްކުރުމަށް ހަމަޖެހިފައިވާ 100 އެނދުގެ ހޮސްޕިޓަލްގެ މަޝްރޫޢުގެ މުހިންމު ބައިވެރިން އިއްޔެ ބައްދަލުވުމެއް ބާއްވައިފިއެވެ.

ކޮންސްޓްރަކްޝަން މިނިސްޓްރީން ބުނެފައިވާގޮތުން، މި ބައްދަލުވުމުގައި ޗައިނާ އިންޓަނޭޝަނަލް ޑިވެލޮޕްމަންޓް ކޯޕަރޭޝަން އޭޖެންސީ (ސީ.އައި.ޑީ.ސީ.އޭ) އާއި ކޮންސްޓްރަކްޝަން މިނިސްޓްރީގެ ޓެކްނިކަލް ޓީމާއެކު، ހޮސްޕިޓަލްގެ ފީސިބިލިޓީ ސްޓަޑީގެ ޓެކްނިކަލް ކަންކަމާއި ހޮސްޕިޓަލް ހިންގުމާ ގުޅޭ ކަންކަމާ ބެހޭގޮތުން މަޝްވަރާކުރެވުނެވެ.

މި ބައްދަލުވުމުގައި ޗައިނާގެ އެމްބަސީއާއި، ސިއްޙީ ވުޒާރާއާއި، އައި.ޖީ.އެމް.އެޗްގެ އިސް ބޭފުޅުން ބައިވެރިވެފައިވެއެވެ. އަދި ދަރުމަވަންތަ ހޮސްޕިޓަލްގެ ސީ.އީ.އޯ އަބްދުއްރައްޒާޤް ޙަލީމާއި މާލެ ސިޓީ ގްރޫޕް އޮފް ހޮސްޕިޓަލްސްގެ އިސްވެރިން ވެސް ބައިވެރިވެފައިވާކަމަށް ކޮންސްޓްރަކްޝަން މިނިސްޓްރީން ހިއްސާކޮށްފައިވާ މަޢުލޫމާތުގައި ބުނެފައިވެއެވެ.

ވިލިމާލޭގައި 100 އެނދުގެ ހޮސްޕިޓަލެއް އަޅަން ނިންމިކަން ސަރުކާރުން ހާމަކުރީ ނިމިދިޔަ ޑިސެންބަރު މަހުގެ 27ވަނަ ދުވަހެވެ. އޭރު އެ މަޝްރޫއު އިއުލާންކުރެއްވީ ހެލްތު މިނިސްޓަރު ޑރ. އަބްދުالله ޚަލީލެވެ.