ފަލަސްޠީނުގެ މިނިވަންކަމަށްޓަކައި ޖިހާދު ކުރަމުންދާ ޙަމާސް ޖަމާޢަތުގެ ސިޔާސީ ގޮފީގެ އިސްވެރިޔާ އިސްމާއީލް ހަނިއްޔާ އަވަހާރަކޮށްލުން ދިވެހި ސަރުކާރުން ކުށްވެރިކޮށްފިއެވެ.

ޚާރިޖީ ވުޒާރާއިން މިކަމާއި ގުޅޭ ގޮތުން ނެރުނު ބަޔާނެއްގައި ބުނީ، ހަމާސްގެ ޕޮލިޓިކަލް ބިއުރޯގެ ޗީފް އިސްމާއިލް ހަނިއްޔާ އީރާނުގައި ހުންނަވަނިކޮށް، ބުދަ ދުވަހުގެ ހެނދުނުގެ ވަގުތެއްގައި ހަމަލާދީ އަވަހާރަކޮށްލުން ސަރުކާރުން ކުށްވެރިކުރާ ކަމަށެވެ.

ހަމައެއާއިއެކު، މި ބަޔާނުގައި ބައިނަލްއަޤްވާމީ ޤާނޫނާއި ބައިނަލްއަޤްވާމީ އިންސާނީ ޤާނޫނު ދަމަހައްޓައި، ޣައްޒާގެ މައްސަލައަށް އަވަސް އަދި ދެމިއޮންނަ ހައްލެއް ހޯދުމުގެ އިތުރުން، އެ ސަރަޙައްދުގައި ސުލްޙައާއި ހަމަޖެހުން ކަށަވަރުކުރުމަށް ރާއްޖެއިން ވަނީ ބޭރުގެ ގައުމުތަކަށް ގޮވާލާފައެވެ.

ހަނިއްޔާ އަވަހާރަކޮށްލާފައި ވަނީ، އީރާނުގެ އާ ރައީސް މައްސޫދު ޕެޒެސްކިއާން ހުވާ ކުރައްވާ ރަސްމިއްޔާތަށް ވަޑައިގެން ވެރިރަށް ތެހެރާނުގައި ހުންނަވަނި ކޮށް ޔަހޫދީން ދިން ހަމަލާއެއްގައެވެ. މިހަމަލާގައި ހަނިއްޔާގެ ބޮޑީގާޑަކުވެސް ވަނީ މަރުވެފައެވެ.

ހަމާސް އިން ބުނީ، މި ހަމަލާދީފައިވަނީ ތެހެރާނުގައި ހުންނަވާ ހަނިއްޔާގެ ގެކޮޅަށް އަމާޒުކޮށް ވައިގެ މަގުން ކަމަށެވެ.

ހަމައެއާއިއެކު، ހަމާސްއިން ބުނީ، ހަނިއްޔާ އަށް އަމާޒުކޮށް ދިން މި ނިރުބަވެރި ހަމަލާއަކީ ޔަހޫދީން ހިންގި ވަރަށް "ފިނޑި" އަމަލެއް ކަމަށާއި އެކަމުގެ ބަދަލު ލުއިކޮށް ނުނަގާނެ ކަމަށެވެ. އަދި އެކަމުގައި ހިމެނޭ ޔަހޫދީންނަށް ވަރުގަދަ ހަމަލާތަކެއް ދޭނެ ކަމުގެ އިންޒާރުވެސް ހަމާސްއިން ވަނީ ދީފައެވެ.

ހަމައެއާއިއެކު، އީރާނުންވެސް މި ހަމަލާގެ ބަދަލު ހިފާނެކަމުގެ އިންޒާރު ދީފައިވާކަން ފާހަގަކޮށްލަން ޖެހެއެވެ.