ފަލަސްޠީނުގެ މިނިވަންކަމަށްޓަކައި ޖިހާދު ކުރަމުންދާ ޙަމާސް ޖަމާޢަތުގެ ސިޔާސީ ގޮފީގެ އިސްވެރިޔާ އިސްމާއީލް ހަނިއްޔާގެ މައްޗަށް ރާއްޖޭގައި ޣައިބަށް ކަށުނަމާދު ކޮށްފިއެވެ.
ހަނިއްޔާގެ މައްޗަށް ރާއްޖޭގެ ހުރިހާ މިސްކިތެއްގައި ހުކުރު ނަމާދަށްފަހު ޣައިބަށް ކަށުނަމާދު ކޮށްފައިވާއިރު، ރާއްޖޭގެ އިތުރުންވެސް ދުނިޔޭގެ އެކި ކަންކޮޅުތަކުގައި ވަނީ ހަނިއްޔާގެ މައްޗަށް ޣައިބަށް ކަށުނަމާދުކޮށްފައެވެ.
ހަނިއްޔާ އަވަހާރަކޮށްލުމާއި ގުޅިގެން ދިވެހި ސަރުކާރުން ނެރުނު ބަޔާނެއްގައި ބުނީ، ހަމާސްގެ ޕޮލިޓިކަލް ބިއުރޯގެ ޗީފް އިސްމާއިލް ހަނިއްޔާ އީރާނުގައި ހުންނަވަނިކޮށް، ބުދަ ދުވަހުގެ ހެނދުނުގެ ވަގުތެއްގައި ހަމަލާދީ އަވަހާރަކޮށްލުން ސަރުކާރުން ކުށްވެރިކުރާ ކަމަށެވެ.
ހަނިއްޔާގެ ޖަނާޒާ އީރާނުގެ ތަހްރާން ޔުނިވަރިސިޓީގައި ބާއްވާފައިވާއިރު، މި ޖަނާޒާގައި އެތައް ހާސްބަޔަކު ވަނީ ބައިވެރިވެފައެވެ. ހަނިއްޔާގެ މައްޗަށް ކަށު ނަމާދު ކޮށްފައިވަނީ އީރާނުގެ ރޫހީ އެންމެ މަތީ ވެރިޔާ އާޔަތުﷲ ޢަލީ އަލް-ޚާމަންޢީއެވެ. އަދި ކަށު ނަމާދަށް ފަހު ހަނިއްޔާ ފަސްދާނުލުމަށް ޤަތަރަށް ވަނީ ގެންގޮސްފައެވެ.
ހަނިއްޔާ އަވަހާރަކޮށްލާފައި ވަނީ، އީރާނުގެ އާ ރައީސް މައްސޫދު ޕެޒެސްކިއާން ހުވާ ކުރައްވާ ރަސްމިއްޔާތަށް ވަޑައިގެން ވެރިރަށް ތެހެރާނުގައި ހުންނަވަނި ކޮށް މިދިޔަ ބުދަ ދުވަހު ޔަހޫދީން ދިން ހަމަލާއެއްގައެވެ. މިހަމަލާގައި ހަނިއްޔާގެ ބޮޑީގާޑަކުވެސް މަރުވެފައިވާކަބް ފާހަގަކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
