ދިވެހިރާއްޖޭގެ ގާނޫނާއި ގަވާއިދުތަކަށް ގޮންޖެހުމުގެ ފުރުސަތު ބިދޭސީންނަށް ނުދެއްވާނެ ކަމަށް އިމިގްރޭޝަން ކޮންޓްރޯލަރ މުޙައްމަދު ޝަމްޢާން ވަހީދު ވިދާޅުވެއްޖެއެވެ.
ސަންގު ޓީވީގެ ”ސަރުކާރު” ޕްރޮގްރާމްގައި ވާހަކަދައްކަވަމުން، ޖިނާޢީ މައްސަލަ ތަކުގައި ހައްޔަރުކުރާ ބިދޭސީންނާމެދު ޢަމަލު ކުރުމަށް ސަރުކާރުން ގެންގުޅުއްވާ ސިޔާސަތާއި ގުޅޭ ގޮތުން ވާހަކަ ދައްކަވަމުން ޝަމްޢާން ވިދާޅުވީ، ބިދޭސީންނާ ގުޅުންހުރި ޖިނާއީ މައްސަލަތައްވެސް ބެލުމުގެ މަސައްކަތް ކުރާނީ ފުލުހުން ކަމަށެވެ. އަދި ފުލުހުން އެފަދަ މައްސަލަތައް ތަހުގީގުކޮށް، ގަވާއިދާ ޚިލާފަށް އުޅެމުންދާ ބިދޭސީން އިމިގްރޭޝަނާ ހަވާލުކުރަމުންދާ ކަމަށެވެ.
މީގެ އިތުރުން، ވިސާއާއެކު އެތެރެވެފައިވާ ބިދޭސީން ނަމަވެސް، ދިވެހިރާއްޖޭގެ ގާނޫނު ތަކާއި ގަވާއިދު ތަކާ ޚިލާފްވެގެން އިމިގްރޭޝަނާ ހަވާލު ކޮށްފިނަމަ، އެ ފަރާތްތައް ޑިޕޯޓް ކޮށްލެވޭނެ ކަމަށް ޝަމްޢާން ވިދާޅުވިއެވެ.
ވިސާ ދޫކޮށްފައި ތިބި ފަރާތްތައް ރާއްޖޭގެ ގާނޫނުތަކާއި ގަވާއިދުތަކާ ޚިލާފަށް އަމަލުކުރަމުންދާކަން ފާހަގަވެގެން އަޅުގަނޑުމެންނާ އެބަ ހަވާލުކުރޭ. ހަވާލު ކުރީމާ އޭގައި އަޅުގަނޑުމެން އިސްތިސްނާއެއް ނުކުރާނަން ކޮންކަހަލަ ކުށެއްތޯއެއް. ދިވެހި ރާއްޖޭގެ ގާނޫނާ ގަވާއިދަށް އަމަލުތަކެއް ކުރަމުންދާނަމަ، އެފަރާތްތައް ޑީޕޯޓް ކުރާނެ. ރާއްޖެއަށް އަނބުރާ އެފަރާތްތަކަކަށް ނާދެވޭނެ.
އިމިގްރޭޝަން ކޮންޓްރޯލަރ މުޙައްމަދު ޝަމްޢާން ވަހީދު
މިއާއެކު، ރާއްޖޭގެ އާއްމު މަސްލަހަތު ގެއްލޭފަދަ ކަންކަން ބިދޭސީން ކުރުމުން، އެފަދަ ފަރާތްތަކާ މެދު ފިޔަވަޅު އެޅުމަކީ މިހާތަނަށް އައި ސަރުކާރުތަކުން ވަރަށް ބޮޑަށް އިހްމާލުވެފައިވާ ކަމެއްކަން ފާހަގަކުރައްވައި ޝަމްޢާން ވިދާޅުވީ، ކަންމިހެން ހުރި ނަމަވެސް ރާއްޖޭގެ ގާނޫނު ތަކާ ގަވާދުތަކަށް ގޮންޖެހުމުގެ ފުރުސަތު ބިދޭސީންނަށް ނުދެވޭނެ ކަަށެވެ.
ރާއްޖޭގެ ގާނޫނު ތަކާ، ގަވާއިދުތަކަށް ގޮންޖެހުމުގެ ފުރުސަތު ބިދޭސީންނަށް ނުދެވޭނެ. އެފަދަ ފަރާތްތައް ފާހަގަވާ ހިނދު އެފަދަ ފަރާތްތަކުގެ ވިސާ ބާތިލް ކުރެވި ރާއްޖެއިން ފުރުވާލެވޭނެ.
އިމިގްރޭޝަން ކޮންޓްރޯލަރ މުޙައްމަދު ޝަމްޢާން ވަހީދު
ޝަމްޢާން މިހެން ވިދާޅުވެފައިވާއިރު، ދާދިފަހުން މާލޭގައި މާރާމާރީ ހިންގި ހަ ބިދޭސީއަކުގެ މައްސަލަ ބަލައި ފުލުހުން އެމީހުން އިމިގްރޭޝަނާ ހަވާލުކޮށްފައިވާއިރު، އެ އެންމެން ޑީޕޯޓް ކުރުމުގެ މަސައްކަތް އިމިގްރޭޝަނުން ކުރަމުން އަންނަ ކަަމަށް އެ އިދާރާއިން ވަނީ ބުނެފައެވެ.
އަދި މި ސަރުކާރު އައި ފަހުން، މިހާތަނަށް 2000 އަށްވުރެ ގިނަ ބިދޭސީން ޑީޕޯޓް ކޮށްފައިވާ ކަމަށްވެސް ޝަމްޢާން ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
