މާލެ ސަރަހައްދާއި އަދި ރާއްޖޭގެ އެކި ރަށްރަށުގައި ތަރައްގީކޮށްފައިވާ ހައުސިންގ ޔުނިޓްތަށް، ކުއްޔަށް ދޭ ފަރާތްތަކަށް ފިޔަވަޅު އަޅާނެ ކަމަށް ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާއިން ބުނެފިއެވެ.

ގެދޮރުވެރިކަމާބެހޭ ވުޒާރާއިން ނެރުނު ބަޔާނެއްގައި ބުނީ، ސަރުކާރުގެ ބޯހިޔާވަހިކަމުގެ ސިޔާސަތާއި ރައީސް ޑރ. މުހައްމަދު މުއިއްޒުގެ ރިޔާސީ ވައުދާއި އެއްގޮތަށް މާލެ ސަރަހައްދާއި އަދި ރާއްޖޭގެ އެކި ރަށްރަށުގައި ތަރައްގީކޮށްފައިވާ ހައުސިންގ ޔުނިޓްތަކުން މަހުން މަހަށް ދައްކަން ޖެހޭ ފައިސާ (އެސްޓިމޭޓެޑް މަންތްލީ އިންސްޓޯލްމެންޓް، ނުވަތަ އީއެމްއައި)ގެ %20 މާފްކޮށްދެއްވާފައިވާ ކަމަށެވެ.

އަދި މި އަހަރުގެ ޖެނުއަރީން ފެށިގެން މަހުން މަހަށް ދައްކަން ޖެހޭ ފައިސާ ގަވާއިދާ އެއްގޮތަށް ދެއްކުމަށް ޔުނިޓްގެ ވަރިފަރާތްތަކަށް އެ ވުޒާރާއިން އަންގާފައި ވާ ކަމަށްވެސް ބުންޏެވެ. 

Advertisement

އެހެންނަމަވެސް، ގިނަ ފަރާތްތަކުން އަދިވެސް މި ހައުސިންގ ޔުނިޓްތަކަށް ފައިސާ ދައްކާފައިނުވާ ކަން ފާހަގަކޮށް އެ ވުޒާރާއިން ވަނީ މަހުން މަހަށް ދައްކަން ޖެހޭ ފައިސާ ގަވާއިދުން ދެއްކުމަށް އިލްތިމާސް ކޮށްފައެވެ.

މިއާއެކު، އެ ވުޒާރާއިން ބުނީ، ގަވާއިދުން ފައިސާ ދައްކަމުން ނުދާ ފަރާތްތަކާއި، ޔުނިޓް ކަނޑައެޅިފައި ބޭނުން ނޫން އެހެން ބޭނުންތަކަށް ޔުނިޓްތައް ބޭނުން ކުރުމާއި، ގަވާއިދާ ހިލާފަށް ތަނަށް ބަދަލުގެނައުމާއި، ކުއްޔަށް ދިނުމާއި ގުޅޭ ކަންކަން އެ ވުޒާރާއިން ބަލަމުންދާ ކަަމަށެވެ.

"މިގޮތަށް ގަވާއިދާ ހިލާފަށް އަމަލު ކުރަމުންދާ ފަރާތްތަކާއި މެދު އެއްބަސްވުމާއި އެއްގޮތަށް ފިޔަވަޅު އަޅާނެ ވާހަކަ ދެންނެވީމެވެ،".