ކުރީގެ ރައީސުލްޖުމްހޫރިއްޔާ އަދި މަޖިލީހުގެ ކުރީގެ ރައީސް މުހައްމަދު ނަޝީދަށް ދިން ބޮމުގެ ހަމަލާގެ މައްސަލަ އަލުން ބެލުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކުގެ ކޮމިޓީ (241 ކޮމިޓީ) އިން ނިންމައިފިއެވެ.

މިއަދު ބޭއްވި އެ ކޮމިޓީގެ ބައްދަލުވުމުގައި، ރައީސް ނަޝީދަށް ދިން ހަމަލާއާ ގުޅިގެން ހެދި އިންކުއަރީގައި މައްސަލަތަކެއް ހުރިކަން ފާހަގަކޮށް ކޮމިޓީގެ މެމްބަރުންގެ އިއްތިފާގުން ވަނީ ސަރުކާރުގެ ސަމާލުކަމަށް އެކަން ގެނައުމަށް ފާސްކޮށްފައެވެ.

ކޮމިޓިގެ ބައްދަލުވުމުގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމް ވިދާޅުވީ މި ހަމަލާއާއި ގުޅޭ އެންމެ ބޮޑު މައްސަލައަކީ ވިލަރެސް ކުރެވިފައި ނެތުން ކަމަށެވެ. އަދި އެ ހަމަލާއާ ގުޅިގެން ނެޝަނަލް ކައުންޓާ ޓެރަރިޒަމް ސެންޓަރަށް އިންޓެލިޖެންސާ ބެހޭ ކަންކަން ބެލޭނެ ގޮތެއް އަދިވެސް ގާއިމުވެފައި ނެތް ކަމަށްވެސް ނާޒިމް ވިދާޅުވިއެވެ.

މި މައްސަލަ ސަރުކާރާ ހިއްސާ ކުރުމަށް މަޖިލީހުން ކުރަމުންދާ މަސައްކަތުގެ އަދާހަމައާއި ގުޅޭގޮތުން ނާޒިމް އެއްސެވުމުން، ކޮމިޓީގެ މުގައްރިރު އަދި އޭދަފުށީ ދާއިރާގެ މެންބަރު އަހުމަދު ސަލީމް ވިދާޅުވީ، އެކަން ސަރުކާރުގެ ސަމާލުކަމަށް ގެނައުމަށްޓަކައި ސިޓީ ލިޔެ ނިންމާފައިވާކަމަށާއި، އެ ސިޓީ މިއަދުގެ ވަގުތެއްގައި ހުށަހަޅުއްވާނެ ކަމަށެވެ. 

2021 ވަނަ އަހަރުގެ މެއި މަހުގެ 6 ވަނަ ދުވަހު ރައީސް ނަޝީދު އަވާހަރާކޮށްލުމަށް ބޮމުގެ ހަމަލާއެއް ދިނީ އެމަނިކުފާނުގެ ގެކޮޅުން ނުކުމެވަޑައިގެން ސެކުއިރިޓީއާއެކު މަޖީދީ މަގުގައި މަޑުކޮށްގެން އޮތް އެމަނިކުފާނު ކާރުކޮޅަށް ވަޑައިގަންނަވަން ދަނިކޮށް، އެތަނުގެ ކައިރީގައި ޕާކުކޮށްފައިވާ ސައިކަލެއްގައި އައިއީޑީއެއް ހަރުކޮށްގެންނެވެ.

މި ހަމަލާއާ ގުޅިގެން ދައުވާ އުފުލާފައިވަނީ މުޖާޒް އަހުމަދު، ތަހުމީން އަހުމަދު، އަލީ ހައިޝަމް، ފަހުމީ އަލީ، އިސްހާގް އަދި މުހައްމަދު ނާޒިމްގެ މައްޗަށެވެ. މި ހަމަލާގައި ބޮން ގޮއްވާލި ވ. ތިނަދޫ، ހިޔާ، އަދުހަމް އަޙްމަދު ރަޝީދު ވަނީ ކުށަަށް އިއުތިރާފުވެފައެވެ. އެހެންކަމުން އޭނާގެ މައްޗަށް ކުށް ސާބިތުވެ ވަނީ 23 އަހަރުގެ ޖަލު ހުކުމެއް އިއްވާފައެވެ.

މި މައްސަލާގައި ހިމެނޭ އެންމެންގެ ޝަރީއަތްތައް އަދި ނިމިފައެއް ނުވެއެވެ.