ބަންގްލަދޭޝްގެ ބޮޑުވަޒީރުކަމުގައި ހުންނެވި ޝައިޚް ހަސީނާ ވެރިކަން ދޫކޮށްލެއްވުމަށްފަހު، ޤައުމު ދޫކޮށް ފިއްލަވައި ވަޑައިގެންފިއެވެ.

ހަސީނާ އެ މަގާމުން މިއަދު އިސްތިއުފާ ދެއްވާފައިމިވަނީ އޭނާގެ ސަރުކާރާއި ދެކޮޅަށް އެގައުމުގައި ވަރުގަދަ މުޒާހަރާކުރަމުންދާ ދަނޑިވަޅެއްގައެވެ.

ހަސީނާ މި މަގާމުން އިސްތިއުފާ ދެއްވިކަން އެގައުމުގެ ސިފައިންނާއި، އިންޑިއާގައި ހުންނަ އެގައުމުގެ ހައި ކޮމިޝަނުން ވަނީ ކަށަވަރުކޮށްދީފައެވެ.

Advertisement

މީޑިއާގެ ބައެއް ރިޕޯޓްތައް ބުނާ ގޮތުގައި 15 އަހަރު ވަންދެން ބަންގްލަދޭޝްގެ ބޮޑުވަޒީރު ކަމުގެ މަގާމު ފުރުއްވި ހަސީނާ "ހިމާޔަތް ހޯދުމަށް" ހެލިކޮޕްޓަރެއްގައި އިންޑިއާއަށް ވަޑައިގެންނެވި އޭނާގެ ތިމާގެ މީހަކާއި އެކުއެވެ.

ހަސީނާ މަގާމުން އިސްތިއުފާ ދެއްވާފައިވަނީ އޭނާގެ ސަރުކާރާ ދެކޮޅަށް ބަންގްލަދޭޝްގައި ވަރުގަދަ މުޒާހަރާތަކެއް ކުރެވެމުންދާ ދަނޑިވަޅެއްގައެވެ.

މި މުޒާހަރާތަކުގައި އެގައުމުގެ 14 ފުލުހުން ހިމެނޭހެން 95 މީހަކު މަރުވެފައިވާއިރު، މުޒާހަރާގެ ބައިވެރިން ވަނީ އެގައުމުގެ ރިޔާސީ ގަނޑުވަރަށް ވެސް ވަދެފައެވެ.

ބަންގްލަދޭޝްގައި މި މުޒާހަރާތައް ފެށިގެން އައީ، ބަންގްލަދޭޝްގެ މިނިވަން ކަމަށް ކުރި ހަނގުރާމައިގެ ބައިވެރިންގެ ޢާއިލާތަކަށް ސަރުކާރު ވަޒީފާތަކުގެ 30 އިންސައްތަ ޚާއްޞަ ކުރުމަށް އެ ޤައުމުގެ ހައި ކޯޓުން ހުކުމް ކުރުމާ ގުޅިގެންނެވެ.

އެގައުމުގެ ހައި ކޯޓުގެ މި ނިންމުމާއިއެކު، ވަކި ބަޔަކަށް ހާއްސަކޮށްފައިވާ ވަޒީފާތަކުގެ ނިސްބަތް 50 އިންސައްތައަށް ވުރެ އިތުރުވިއިރު، ފަހުން ކޯޓުން ވަނީ ނިންމުން ބާތިލްވެސް ކޮށްފައެވެ. އެހެންނަމަވެސް، އޭގެ ފަހުންވެސް މުޒާހަރާތަކަށް ނިމުމެއް އައިސްފައެއް ނުވެއެވެ.

ބަންގްލަދޭޝްގެ ސަރުކާރާއި ދެކޮޅަށް ކުރާ މުޒާހަރާތައް ފުޅާވެ، މި މުޒާހަރާތަކުގައި މިހާތަނަށް 11،000 މީހުން ވަނީ ހައްޔަރުކޮށްފައެވެ.