ބަންގްލަދޭޝްގައި ކުއްލި ނުރައްކަލުގެ ހާލަތު އިއުލާނު ނުކުރާނޭކަމަށް، އެޤައުމުގެ ހިންގުމާ ވަގުތީގޮތުން ހަވާލުވެ ހުންނެވި ސިފައިންގެ ވެރިޔާ ޖެނެރަލް ވޭކަރ އުޒް ޒަމާން ވިދާޅުވެއްޖެއެވެ.
މީޑިއާ މެދުވެރިކުރައްވައި ދެއްވި މެސެޖެއްގައި ޖެނެރަލް ވިދާޅުވީ، ޤައުމުގެ ކަންކަން އިތުރަށް ގޯސްވެގެން ނުދާނަމަ، ކުއްލި ނުރައްކަލުގެ ހާލަތު އިއުލާނުކުރުމުގެ ބޭނުމެއް ނެތްކަމަށެވެ. އޭނާ ވަނީ ރައްޔިތުންގެ އެއްބާރުލުން މިވަގުތު ސަލާމަތީ ބާރުތަކަށް ދިނުމަށް އެދިވަޑައިގެންފައެވެ.
ބަންގްލަދޭޝްގެ ބޮޑުވަޒީރު ހަސީނާ އިސްތިއުފާ ދެއްވައި ޤައުމުދޫކޮށް ވަޑައިގަތުމާއި ގުޅިގެން މިހާރު ޤައުމުގެ ކަންކަން ކުރިއަށްގެންދަނީ އަސްކަރިއްޔާގެ ބެލުމުގެ ދަށުންނެވެ.
ސިފައިންގެ ވެރިޔާ ޖެނެރަލް ވޭކަރ އުޒް ޒަމާން ވިދާޅުވީ ފުލުހުންނާއި ސިފައިން، ރައްޔިތުންގެ ގަޔަށް ބަޑި ނުޖަހާނޭ ކަމަށާއި، މުޒާހިރާގައި މަރުވެދިޔަ އެންމެނަށް އިންސާފް ހޯދައިދެއްވާނޭ ކަމަށެވެ. އަދި ރައީސް އާއެކު މަޝްވަރާކޮށް ވަގުތީ ސަރުކާރެއް އެކުލަވާލައި އެ ކަން ދެ ދުވަހެއްގެ ތެރޭގައި އިއުލާނު ކުރައްވާނޭ ކަމަށްވެސް އޭނާ ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
