މަކަރާއި ހީލަތުން ފައިސާ ހޯދައި، އެ ފައިސާ ޖަމާކުރުމަށް ސްކޭމަރުން ބޭނުންކުރާ ބޭންކް އެކައުންޓުތައް ކޯޓު އަމުރެއް ނެތި ހިފެހެއްޓުމުގެ ބާރު ފުލުހުންނަށް ދިނުމަށް ގާނޫނަށް އިސްލާހެއް ހުށަހަޅައިފިއެވެ.

އިދިކޮޅު އެމްޑީޕީގެ ފަރާތުން މި އިސްލާހު ހުށަހެޅުއްވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) އެވެ. 

ގާނޫނުގެ 73 ވަނަ މާއްދާގެ (ހ)އަށް މުހައްމަދު އިބްރާހިމް ހުށަހެޅުއްވި އިސްލާހުގައި، ޖިނާއީ ބޮޑު ކުށެއްގެ އިތުރުން، 'މަކަރާއި ހީލަތުން ނުވަތަ ސްކޭމްއަކުން އެކައުންޓުގެ ވެރިފަރާތަށް އޮޅުވާލައިގެން ފައިސާ ނަގަމުންދާ' މައްސަލަތަކުގައި، ކޯޓު އަމުރު ފުލުހުންނަށް ލިބުމުގެ ކުރިން، ކޯޓުން އަމުރާ މެދު ގޮތެއް ނިންމުމަށް ހޭދަވާ މުއްދަތުގައި، ސްކޭމަރުންގެ އެކައުންޓަށް ފިޔަވަޅު އެޅުމުގެ ބާރު ފުލުހުންނަށް ދިނުމަށް ބަޔާންކޮށްފައިވެ. 

Advertisement

އެގޮތުން، ސްކޭމަރުގެ އެކައުންޓުގައިވާ ފައިސާ ނުވަތަ އެކައުންޓުން ފައިސާ ޓްރާންސްފާ ކޮށްފައިވާ އެހެން އެކައުންޓުތަކުގެ ފައިސާ ހިފެހެއްޓުމަށް ނުވަތަ އެ ފައިސާއިން މުއާމަލާތް ކުރުން ހުއްޓުވުމުގެ އަމުރެއް ނެރުމުގެ ބާރު ފުލުހުންނަށް ދޭން އިސްލާހުގައިވެއެވެ. 

އަދި އެފަދަ އަމުރެއް ފުލުހުންގެ ފަރާތުން ނެރެވޭނީ، ސަބް އިންސްޕެކްޓާ އޮފް ޕޮލިސްގެ ރޭންކުން ފެށިގެން މަތީ އޮފިސަރަކަށް ކަމަށާ، އެ އަމުރެއް ލަސްނުކޮށް އެ އެކައުންޓު ހުޅުވާފައިވާ ބޭންކު ނުވަތަ އިދާރާއަށާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ)އަށް އަންގަންވާނެ ކަމަށް ބުނެފައިވެއެވެ. 

މި އިސްލާހުތަކަށް އަމަލު ކުރާނީ، ބިލު މަޖިލީހުން ފާސްވެ، އެ ބިލު ރައީސުލްޖުމްހޫރިއްޔާ ތަސްދީގު ކުރައްވައި ގާނޫނަކަށްވެ، ސަރުކާރުގެ ގެޒެޓްގައި ޝާއިއު ކުރާ ދުވަހުން ފެށިގެންނެވެ.