ދިވެހިރާއްޖެއަށް އިންޑިޔާގެ ފަތުރުވެރިން އަންނަ ނިސްބަތް ދަށްވީ ސަބަބު ތަކެއް މެދުވެރި ވެގެން ކަމަށާ، މިއަދު ސަރުކާރު ތިބީ “އެގޮތަށް ނޫން” ކަމަށް ފަތުރުވެރިކަމާ ބެހޭ ވުޒާރާގެ ވަޒީރު އިބްރާޙީމް ފައިޞަލް ވިދާޅުވެއްޖެއެވެ.
ދިވެހިރާއްޖެއަށް އިންޑިޔާ ފަތުރުވެރިން އަންނަ ނިސްބަތް 2021 ވަނަ އަހަރުން ފެށިގެން ވަރަށް ބޮޑަށް މަތިވެ، ރާއްޖެއަށް އެންމެ ގިނަ ފަތުރުވެރިން އަންނަ ގައުމަކަށްވެސް އެ ގައުމު ވެގެން ދިޔަ އެވެ. އެހެންނަމަވެސް، މި ސަރުކާރު އައި ފަހުން، އިންޑިޔާ މާކެޓް ވަރަށް ބޮޑު ތަނުން ދަށްވެ، މިހާރު އިންޑިޔާ އުޅެނީ 5 ވަނައިންވެސް ދަށުގައެވެ.
މިހާރު ރާއްޖެއަށް އެންމެ ގިނަ ފަތުރުވެރިން އަންނަ ގައުމަކަށް އޮތީ ޗައިނާ އެވެ.
އިންޑިޔާ ފަތުރުވެރިން އަންނަ ނިސްބަތް ދަށްވެފައިވާތީ، އެ ގައުމުގެ ފަތުރުވެރިން އަންނަ ނިސްބަތް އިތުރު ކުރުމަށް ވަޒީރު ފައިޞަލް އާއި އެމްއެމްޕީއާރްސީގެ ޓީމުން ދާދިފަހުން ވަނީ އެގައުމުގައި ދިވެހިރާއްޖޭގެ ފަތުރުވެރިކަން ޕްރޮމޯޓް ކުރުމަށް “ވެލްކަމް އިންޑިޔާ” ނަމުގައި ރޯޑް ޝޯ އެއްވެސް ކުރިއަށް ގެމްގޮސްފައެވެ.
އެމްއެމްޕީއާރސީން މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން: ފޮޓޯ/ ވޮއިސް
އެކަމާއި ގުޅިގެން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފައިސަލް ވިދާޅުވީ، ރާއްޖެއަށް އިންޑިޔާ ފަތުރުވެރިން އަންނަ ނިސްބަތް ދަށްވެގެން ދިޔައީ ސަބަބު ތަކެއް މެދުވެރި ވެގެން ކަމަށެވެ.
އިންޑިއާ މާކެޓް ދަށްވީ ސަބަބުތަކެއް މެދުވެރިވެގެން. މިއަދު އަޅުގަނޑުމެން މިތިބީ އެގޮތަކަށްނޫން. މިއަދުގެ ރައީސް ޑރ މުހައްމަދު މުޢިއްޒުގެ ފޮރިން ސިޔާސަތަކީ ހުރިހާ ގައުމަކާ އެކުވެސް ވަރަށް ގާތް އެކުވެރި ގުޅުމަކާއެކު ކުރިއަށް ދިޔުން. އަޅުގަނޑުމެންގެ ސްޓޭންޑަކީ އިންޑިޔާއާއެކުވެސް، ޗައިނާއާއެކުވެސް ވަރަށް ގާތް ގުޅުމެއް ބާއްވައިގެން. ދުނިޔެއާއި ގުޅިގެން… އެކަހެރި ވުމެއް ނޫން އަޅުގަނޑުމެންގެ ވިސްނުމަކީ
ފަތުރުވެރިކަމާ ބެހޭ ވުޒާރާގެ ވަޒީރު އިބްރާޙީމް ފައިޞަލް
ވަޒީރު ވިދާޅުވީ މި ސަރުކާރުގެ އެ ސިޔާސަތުގެ ސަބަބުންވެސް އިންޑިޔާ މާކެޓް ވަރަށް ބޮޑަށް ކުރިއަރައިގެން ދާނެ ކަމަށެވެ.
އަދި އިންޑިޔާގައި ބޭއްވުނީ ވަރަށް ކާމިޔާބު ރޯޑް ޝޯއެއް ކަމަށާ، އަދުވެސް އެގައުމުގައި ފަތުރުވެރިކަން ޕްރޮމޯޓް ކުރުމަށް އެގައުމަށް ދިޔުމަށް ނިންމާފައިވާ ކަން ފާހަގަކުރައްވައި ވަޒީރު ވަނީ އެކަންކަމާއެކު އިންޑިޔާގެ ނުފޫޒުގަދަ ފަރާތްތައްވެސް ރާއްޖެ އަންނަން ފަށާނެކަން ފާހަގަކުރައްވާފައެވެ.
2021 ވަނަ އަހަރުގެ ތެރޭގައި ރާއްޖޭގައި އިންޑިޔާގެ ފަތުރުވެރިން އެންމެ ބޮޑަށް އިތުރުވެގެން ގޮސްފައިވަނީ، ކޮވިޑް އާއި ގުޅިގެން، އެގައުމުގެ ރައްޔިތުންގެ ކަރަންޓީނު ވުމަށް ރާއްޖޭގައި މަޑު ކުރަން ފެށުމާއެކުއެވެ. އެއާއެކު ރާއްޖޭގެ ޓޮޕް މާކެޓަށް އިންޑިޔާ ވެގެން ދިޔައެވެ. އެކަން ނިމުމާއެކު، އިންޑިޔާ ޓޮޕް މާކެޓް ގެ ގޮތުގައި އޮތް ނަމަވެސް، އެގައުމުގެ ފަތުރުވެރިން އަންނަ ނިސްބަތް އައީ ދަށް ވަމުންނެވެ.
Advertisement
This content is created and paid for by advertisers and does not involve Voice Journalists
