އިންޑިއާއަކީ ރާއްޖެއަށް އެހީ ބޭނުންވާ ކޮންމެ ވަގުތެއްގައި އެހީތެރިކަން ފޯރުކޮށްދޭ އެންމެ ގާތް އެއް ގައުމުކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
އިންޑިއާގެ އެގްޒިމް ބޭންކުން ދޫކޮށްފައިވާ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން ރާއްޖޭގެ 28 ރަށެއްގެ ފެނާއި ނަރުދަމާގެ މަސައްކަތް ނިންމައި، އިންޑިއާ ސަރުކާރުން ދިވެހި ސަރުކާރަށް ހަވާލު ކުރުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ޑރ.މުޢިއްޒު ވިދާޅުވީ، އިންޑިއަން ގްރާންޓް އެސިސްޓެންސްގެ ދަށުން ހިންގާ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްތަކަކީ، އިޖްތިމާޢީ އިޤްތިޞާދީ ތަރައްޤީގައި ދެގައުމުގެ ދެމެދުގައި އޮތް ގުޅުން ހާމަކޮށްދޭ ކަމެއް ކަމަށެވެ.
މި ސްކީމްގެ ދަށުން ގިނަ ޕްރޮޖެކްޓްތަކެއް މިހާރުވެސް ކުރިއަށްދާކަން ފާހަގަކުރައްވަމުން ރައީސް ޑރ.މުޢިއްޒު ވިދާޅުވީ، މި ޕްރޮޖެކްޓްތައް މިހާރަށްވުރެ އަވަސްކޮށްދެއްވާނެ ކަމަށް އުންމީދުކުރައްވާ ކަމަށާއި، މި ސްކީމާއި ލައިން އޮފް ކްރެޑިޓް ފެސިލިޓީ އަލުން އެކުލަވާލުމުގައި އިންޑިއާއިން ދީފައިވާ ލުއިފަސޭހަތަކަށް ޝުކުރުއަދާކުރައްވާކަމަށެވެ.
"އިންޑިއާއަކީ އަޅުގަނޑުމެން އެހީ ބޭނުންވާ ކޮންމެ ވަގުތަކު ވެސް އެހީތެރިކަން ފޯރުކޮށްދޭ، އަޅުގަނޑުމެންގެ އެންމެ ގާތް އެކުވެރިޔާ އަދި އަގުނުކުރެވޭ އެއް ބައިވެރިޔާ،"
ރައީސް ޑރ.މުޢިއްޒު ވިދާޅުވިއެވެ.
ރައީސް ޑރ.މުޢިއްޒުގެ ވާހަކަފުޅުގައި އެމަނިކުފާނު ވަނީ އިންޑިއާއިން ރާއްޖެއަށް ފޯރުކޮށްދޭ އެހީތެރިކަމަށްޓަކައި އެގައުމުގެ ބޮޑުވަޒީރު ނަރެންދްރަ މޯދީ އަށް ސަރުކާރާއި ދިވެހި ރައްޔިތުންގެ ނަމުގައި ޝުކުރު އަދާކުރައްވާފައެވެ. އަދި ކުރިއަށް އޮތް އަހަރުތަކުގައި ރާއްޖެ އާއި އިންޑިއާގެ ގުޅުން މިހާރަށްވުރެ ބޮޑަށް ބަދަހިވެގެންދާނެކަމަށް އުންމީދުކުރައްވާކަމަށް ވެސް ރައީސް ޑރ.މުޢިއްޒު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
