އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމަނިއަމް ޖައިޝަންކަރު ރާއްޖޭގައި ކާމަރަނގަ ގަހެއް އިންދަވައިފި އެވެ.

މި ގަސް އިންދަވާފައިމިވަނީ ޖައިންޝަންކަރު މިހާރު ރާއްޖެއަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު  ލޮނުޒިޔާރަތް ޕާކުގަ އެވެ.

މިކަމާއި ގުޅޭގޮތުން  މޫސުމީ ބަދަލުތަކާ ތިމާވެއްޓާއި ހަކަތައާއި ބެހޭ ވުޒާރާއިން ބުނީ، މިއީ ރާއްޖޭގައި ސަރުކާރުން ކުރިއަށްގެންދާ 5 މިލިއަން ގަސް އިންދުމުގެ ޕްރޮގްރާމާއި އިންޑިއާގެ ޕްލާންޓްފޯމަދާ އިނީޝިއޭޓިވް ގެ ދަށުން އިންދާފައިވާ ގަހެއް ކަމަށެވެ.

މިކަމަށްޓަކައި ޖައިޝަންކަރުގެ އަރިހުގައި ޚާރިޖީ ވަޒީރު މޫސާ ޒަމީރާއި ތިމާވެއްޓާއި ބެހޭ ވަޒީރު ތޯރިގު އިބްރާހިމާއި މާލެ ސިޓީގެ މޭޔަރު އާދަމް އާޒިމް އަދި އިންޑިއާއިން ރާއްޖެއަށް ކަނޑައަޅުއްވާފައިވާ ސަފީރު މުނޫ މަހާވަރު ބައިވެރިވެވަޑައިގެންނެވިއެވެ.

މިކަމާއި ގުޅޭގޮތުން ޖައިޝަންކަރު އެކްސްގައި ކުރެއްވި ޕޯސްޓެއްގައި ވިދާޅުވީ، އެ ގަސް އިންދުމަކީ ދެމެހެއްޓެނިވި މުސްތަގުބަލަކަށްކުރާ މަސައްކަތާއި އިންޑިއާއި ރާއްޖެއާ ދެމެދު އޮތް ދެމިގެންވާ ގުޅުމުގެ ރަމްޒެއް ކަމަށެވެ.

ސަރުކާރުން ކުރިއަށްގެންދާ 5 މިލިއަން ގަސް އިންދުމުގެ ޕްރޮގްރާމަކީ ދުނިޔޭގެ ތިމާވެށި ދުވަހާއި ގުޅިގެން މިދިޔަ ޖޫންމަހުގެ 5 ވަނަ ދުވަހު ފެށި ޕްރޮގްރާމެކެވެ. 

ވެރިކަމުގެ ފަސް އަހަރުގެ ތެރޭގައި ފަސް މިލިއަން ގަސް އިންދުމަކީ ސަރުކާރުގެ މެނިފެސްޓޯގައި ހިމެނޭ ކަމެއްކަން ފާހަގަކޮށްލަން ޖެހެއެވެ.