އިންޑިއާއާއިއެކު އޮތް ގުޅުން ވަރުގަދަ ވަމުންދާނެކަމުގެ ޔަގީންކަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ދެއްވައިފިއެވެ.
ރައީސް ޑރ.މުޢިއްޒު މިފަދައިން ވިދާޅުވެފައިވަނީ، އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ރާއްޖެއަށް ކުރައްވާ ރަސްމީ ދަތުރުފުޅުގެ ތެރެއިން މިއަދު ރައީސް އޮފީހުގައި ދެ ބޭފުޅުން ބޭއްވި ބައްދަލުކުރެއްވުމަށްފަހު، އެކްސް ގައި ކުރެއްވި ޕޯސްޓެއްގައެވެ.
ރައީސް ވިދާޅުވީ ރާއްޖޭގެ 28 ރަށެއްގައި ފެނާއި ނަރުދަމާގެ މަސައްކަތް ގާއިމްކުރުމުގެ މަސައްކަތް ނިންމައި އިންޑިއާއިން ދިވެހި ސަރުކާރާއި އެ މަޝްރޫއުތައް ރަސްމީކޮށް ހަވާލުކުރުމުގެ ރަސްމިއްޔާތުގައި ބައިވެރިވެވަޑައިގެނެވުމަކީ ލިބިވަޑައިގެންނެވި އުފަލެއް ކަމަށެވެ.
ހަމައެއާއިއެކު، ރައީސް ޑރ.މުޢިއްޒު ވަނީ ރާއްޖޭގެ އެކި ކަންކަމުގައި އިންޑިއާގެ ބޮޑުވަޒީރު ނަރެންދްރަ މޯދީ ދެއްވާ އެއްބާރުލުމަށް އެމަނިކުފާނަށްވެސް ޝުކުރު އަދާކުރައްވާފައެވެ.
ރައީސް މުޢިއްޒު ގެ ޕޯސްޓްގައި އެމަނިކުފާނު ވަނީ ދެގައުމުގެ ދެމެދުގައި އޮތް ގުޅުން މިހާރަށް ވުރެ ބަދަހި ވެގެންދާއިރު، އޭގެ ތެރޭގައި ސަލާމަތާއި، ތަރައްޤީއާއި، ކަލްޗަރަލް އެކްސްޗޭންޖް ވެސް ހިމެނޭ ކަމަށެވެ.
ދެ ގައުމުގެ ގުޅިގެން އުޖާލާ، ފާގަތި މުސްތަޤްބަލެއް ބިނާކުރައްވާނެ ކަމުގެ ޔަގީންކަން ރައީސް ޑރ.މުޢިއްޒު ވަނީ ދެއްވާފައެވެ.
Advertisement
This content is created and paid for by advertisers and does not involve Voice Journalists
