އިންޑިއާގެ އެގްޒިމް ބޭންކުގެ ކްރެޑިޓް ފެސިލިޓީގެ ދަށުން ކުރިއަށް ގެންދިޔަ އައްޑޫ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުގެ އިތުރުން ހަންކެޑެ ބްރިޖު މަޝްރޫއު ނިންމައި ދިވެހި ސަރުކާރާއި މިއަދު ހަވާލުކޮށްފިއެވެ.

މި މަޝްރޫއުތައް އިންޑިއާ ސަރުކާރުގެ ފަރާތުން ދިވެހި ސަރުކާރާއި ހަވާލުކޮށްދެއްވީ ރާއްޖެއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން އައްޑޫ ސިޓީއަށް ވަޑައިގެން އެގައުމުގެ އެކްސްޓާނަލް އެފެއާޒް މިނިސްޓާރު ސުބްރަމަނިއަމް ޖައިޝަންކަރު އެވެ.

އައްޑޫ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުގެ ދަށުން 184.3 ހެކްޓަރުގެ ބިން ހިއްކާފައިވާއިރު، އޭގެ ތެރޭގައި ހިމެނެނީ:

Advertisement

1) ހިތަދޫގެ ދެ ސަރަހައްދެއް ހިމެނޭހެން 80 ހެކްޓަރު

2) މަރަދޫ އަދި މަރަދޫ-ފޭދޫގައި 76 ހެކްޓަރު

3) އައްޑޫ ޑީޓުއާ ލިންކް އެންބޭންކްމަންޓަށް ބޭނުންވާ 3.3 ހެކްޓަރު

4) ފަތުރުވެރިކަމަށް ހާއްސަކޮށްގެން ހިއްކި 8.3 ހެކްޓަރުގެ ތިން ރަށް

މި ބިންތަކުގެ ގޮނޑުދޮށް ހިމާޔަތްކުރުމުގެ ގޮތުން ޖުމުލަ ހަތް ކިލޯމީޓަރުގެ ބޮޑުހިލަ ޖަހާފައިވާއިރު، ފަތުރުވެރިކަމަށް ހިއްކި ތިން ރަށުގެ ގޮނޑުދޮށް ހިމާޔަތްކުރުމުގެ ގޮތުން ޖުމުލަ 4.1 ކިލޯމީޓަރުގެ ޖިއޯޓިއުބް ތޮށި ލާފައިވާކަން ފާހަގަކޮށްލަން ޖެހެއެވެ.

މީގެ އިތުރުންވެސް މިއަދު ސަރުކާރާއި ހަވާލުކުރި، އައްޑޫ މަގު ހެދުމާއި ފެން ހިންދާ ނިޒާމު ގާއިމުކުރުމުގެ މަޝްރޫއުގެ ތެރޭގައި ހިމެނޭ ހަންކެޑެ ބްރިޖަކީ ދިގުމިނުގައި 1.5 ކިލޯމީޓަރު ހުންނަ ބްރިޖެކެވެ. މިއީ ހަންކެޑެ ހިމެނޭ ސަރަހައްދުގައި މިހާރު ބޭނުންކުރަމުން އަންނަ ލިންކް ރޯޑުގެ ކައިރިން ހަންކެޑެއަށް ނާރާ ގޮތަށް ހިތަދޫ ގައުކެޑެއާއި މަރަދޫއާ ގުޅާލުމަށްޓަކައި ހަދާފައިވާ ބްރިޖެކެވެ.

މި މަޝްރޫޢުގައި ދެ ބްރިޖާއި ތިން އެމްބޭންކްމަންޓްސް ހިމެނޭއިރު، 1.4 ކިލޯމީޓަރުގެ ހަތަރު ލޭން ހިމެނޭ ބްރިޖް ގެ މަސައްކަތް ފަށާފައިވަނީ 2021 ވަނަ އަހަރުއެވެ.

ހަންކެޑެ އާއި ގައުކެނޑިއާ ދެމެދު އޮތް ބްރިޖު ބަދަލުކޮށް، އެ ހިސާބުގައި ވަކި ބްރިޖް އަޅައިގެން ހަންކެޑެ ތަރައްގީ ކުރަމުންދާއިރު މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ) އިން ތަރައްގީ ކުރަމުންދާ ހަންކެޑެ އަކީ  ރިއަލް ސްޓޭޓް ޓޫރިޒަމަށް ސަރުކާރުން ހަމަޖައްސާފައިވާ ތަނެއްކަން ފާހަގަކޮށްލަން ޖެހެއެވެ.