އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރު ރާއްޖެއަަށް ކުރެއްވި ތިން ދުވަހުގެ ރަސްމީ ދަތުރުފުޅު ނިންމަވާލެއްވުމަށްފަހު އެނބުރި އިންޑިއާއަށް ފުރާވަޑައިގެންފިއެވެ.
ޚާރިޖީ ވަޒީރު މޫސާ ޒަމީރުގެ ދައުވަތަކަށް ކުރެއްވި ދަތުރުފުޅު ނިންމަވާލެއްވުމަށްފަހު ޖައިޝަންކަރު އިންޑިއާއަށް ފުރާވަޑައިގަތީ މިއަދު އައްޑޫ ސިޓީއަށް ވަޑައިގަތުމަށްފަހު، ގަން އެއާޕޯޓުންނެވެ.
މިގޮތުން އައްޑޫ އަށް ވަޑައިގެން ޖައިޝަންކަރު ވަނީ އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ކްރެޑިޓް ފެސިލިޓީގެ ދަށުން ކުރިއަށްގެންދިޔަ އައްޑޫގެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއު ނިންމައި، ދިވެހި ސަރުކާރާއި ހަވާލުކޮށްފައެވެ.
މީގެ އިތުރުންވެސް ޖައިޝަންކަރު ރާއްޖެއަށް ކުރެއްވި ދަތުރުފުޅުގައި، އެބޭފުޅާ ވަނީ ތިލަމާލެ ބްރިޖްގެ މަސައްކަތް ބައްލަވާލެއްވުމުގެ އިތުރުން، އިންޑިއާގެ އެހީގައި ނިންމި 28 ރަށެއްގެ ފެނާއި ނަރުދަމާގެ މަޝްރޫއުތައް ވެސް ދިވެހި ސަރުކާރާއި ހަވާލުކޮށްދެއްވާފައެވެ.
މީގެ އިތުރުންވެސް މުހިންމު މަޝްވަރާތަކެއް ކެބިނެޓް ވަޒީރުންނާއި ދައުލަތުގެ އިސްބޭފުޅުންނާއި އެކު ކުރެއްވުމުގެ އިތުރުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އާއި އިދިކޮޅު އެމްޑީޕީގެ އިސްބޭފުޅުންނާއި ޖައިޝަންކަރު ވަނީ ބައްދަލުކުރައްވާފައެވެ.
Advertisement
This content is created and paid for by advertisers and does not involve Voice Journalists
