ނިމިގެންދިޔަ އެމްޑީޕީގެ ވެރިކަމުގައި ފަޅުން ގޯތި ދޫކުރެވިފައިވާކަމަށް އެ ޕާޓީން މިއަދު ބުނެފިއެވެ.

ހައުސިން މިނިސްޓަރު އަލީ ހައިދަރު މިއަދު މަޖިލީހަށް ހާޒިރުކުރި ކުރުމާއި ގުޅޭގޮތުން އެމްޑީޕީގެ ޕީޖީ ގްރޫޕުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ޕާޓީގެ ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވަނީ އެމްޑީޕީ ސަރުކާރުގައި ބިން ނުހިއްކަނީސް ފަޅަކުން ގޯތި ދޫކޮށްފައިވާކަމަށް ވިދާޅުވެފައެވެ.

ނާޒިލް މިމޭރުމުން ވާހަކަދައްކަވާފައިވަނީ ސަރުކާރަށް ނިސްބަތްވާ ފަރާތްތަކުން، ކުރީ ސަރުކާރުން މާލޭ ރައްޔިތުންނަށް ކަނޑުންވެސް ގޯތި ދޫކޮށްފައިވާކަމަށް ބުނެ ދައްކަމުންދާ ވާހަކަތަކަށް ރައްދު ދެއްވަމުން ދެއްކެވި ވާހަކަފުޅުގައެވެ.

ނާޒިލް ވިދާޅުވީ ގޯތިތައް ދޫކުރުން ލަސްވުމުގެ މައިގަނޑު ސަބަބަކީ އޭރު އެމްޑީޕީ ސަރުކާރުން ކުރަމުން އައި މަސައްކަތުގެ އަމާޒު މި ސަރުކާރުން އަނބުރާލުމުން ކަމަށެވެ. އެގޮތުން ފުށިދިއްގަރުފަޅު މަޝްރޫޢު އިފްތިތާހުކޮށް އޭރު އެމްޑީޕީ ސަރުކާރުން ގޯތި ދޫކުރުމަށް ކުރަމުން އައި މަސައްކަތް އަދުގެ ސަރުކާރުން ހުއްޓުވާލާފައިވާކަމަށް ނާޒިލް ވިދާޅުވިއެވެ.

އެމްޑީޕީގެ ސަރުކާރުގެ އެންމެ ފަހު ދުވަސްކޮޅު ގޯތިތައް ދޫކުރުމުގެ ކަންކަން ކުރަމުންދިޔައިރުވެސް މި ސަރުކާރުގައި ތިބި ފަރާތްތަކުގެ މަސައްކަތަކަށްވީ ދޫކުރަމުން އައި ގޯތިތަކުގެ މަސައްކަތް އޭސީސީ މެދުވެރިކޮށާއި އެނޫންވެސް ގޮތްގޮތުން ހުއްޓުވާލުންކަމަށް ނާޒިލް ފާހަގަކުރެއްވިއެވެ

މިއަދު ރައްޔިތުންގެ މަޖިލީހުގެ ތަޅުމަށް ހާޒިރުވެ ވަޑައިގަތް މި މައުލޫގައި ވާހަކަދައްކަވަމުން ހައުސިން މިނިސްޓަރު ހައިދަރު ވިދާޅުވީ އެމްޑީޕީ ސަރުކާރުން މާލޭގެ ރައްޔިތުންނަށް ބޯހިޔާވަހިކަން ދިނުމަށްގޯތިތައް ދޫކޮށްފައިހުރީމަގުތަކަށް އަރާގޮތަށާއި، ކުންފުނިތަކުން މަސައްކަތްކުރުމަށް އެއްޗެހިތައް ބަހައްޓާފައިހުރި ސަރަހައްދުން ކަމަށެވެ.

ގޯތިތައް ދޫކުރިއިރު، ކަނޑުންނާއި ފަޅުންވެސް ގޯތި ދޫކޮށްފައިވާކަން މިނިސްޓަރު ވިދާޅުވިއެވެ. މިގޮތުން ފަޅުން އެކަނިވެސް 700 އާ ގާތްކުރާ އަދަދަކަށް ގޯތި ދޫކޮށްފައިވާކަން މިނިސްޓަރު ފާހަގަކުރެއްވިއެވެ. މިނިސްޓަރު ވިދާޅުވީ ކަނޑުންނާއި ފަޅުން ދޫކޮށްފައިވާ ގޯތިތައް އެއީ ގޯތީގެ ގޮތުގައި ނުބެލެވޭނޭކަމަށެވެ.