ސަރުކާރުގެ ފަރާތުން، ފަތުރުވެރިކަމާބެހޭ ޤާނޫނަށް ހުށަހަޅާފައިވަނީ ރަނގަޅު އިސްލާހުތަކެއް ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ އިދިކޮޅު އެމްޑީޕީ އަށް ނިސްބަތްވެވަޑައިގަންނަވާ މައުރޫފް ޒާކިރު ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި ޓޫރިޒަމް ގާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުން މައުރޫފް ޒާކިރު ވިދާޅުވީ، މިހާތަނަށް ފަތުރުވެރިކަމުގެ ފައިދާ ކޮށްފައިވަނީ ޓޫރިސްޓް ރިސޯޓްތައް އޮޕަރޭޓްކުރާ ފަރާތްތަކަށް ކަމަށެވެ. 

އެހެން ނަމަވެސް، ފަތުރުވެރިކަމަކީ ދިވެހިންނަށްޓަކައި ހިންގޭ ފަތުރުވެރިކަމަކަށް ބަދަލު ކުރަންޖެހޭ ކަމަށާ، ފަތުރުވެރިކަމުގެ ހަގީގީ މަންފާ އެންމެހާ ދިވެހިންނަށް ލިބިގެންދާނީ އޭރުން ކަމަށް މައުރޫފް ވިދާޅުވިއެވެ. 

Advertisement

މިއާއެކު މައުރޫފް ވިދާޅުވީ، ޓޫރިޒަމަށް އިންވެސްޓްކުރާ ފަރާތުން 15 އަހަރުގެ ތެރޭގައި 10-12 ރިސޯޓް އޮޕަރޭޓް ކުރަމުންދާއިރު، އެ މުއްދަތުގެ ތެރޭގައި އެ ރިސޯޓްގައި މަސައްކަތްކުރާ މުވައްޒަފަށް “ތިން ކޮޓަރީގެ ގެއެއްވެސް ނޭޅޭ” ކަމަށެވެ.

ކެންދޫ ދާއިރާގެ މެންބަރު މައުރޫފް ޒާކިރު : ފޮޓޯ/ މަޖިލިސް

މީގެ އިތުރުން މައުރޫފްވަނީ ފަތުރުވެރިކަމުގެ ދާއިރާގައި މަސައްކަތްކުރާ ދިވެހިންގެ ނިސްބަތް ދަށްވަމުންދާތީ ކަމްބޮޑުވުންފާޅުކުރައްވައި، އެ ދާއުރާގެ ރަނގަޅު ވަޒީފާތަކަކީ ދިވެހިންނަށް ޚާއްސަ ވަޒީފާތަކަށް ހަދައި ދިވެހިންނަށް ޓޫރިޒަމުން ލިބޭ އާމްދަނީ އިތުރު ކުރުމަށް މަސައްކަތް ކުރަންޖެހޭ ކަމަށް ވިދާޅުވެފައެވެ. 

މީގެ އޮތުރުން މައުރޫފް ވިދާޅުވީ، ރާއްޖޭގެ ޓޫރިޒަމުން ނެގޭ ޓެކްސްތައް މުރާޖާ ކުރަންޖެހޭ ކަމަށާ، “ޕްރޮގްރެސިވް ޓެކްސްއަކާއި ދިމާއަށް” ދާންޖެހޭ ކަމަށެވެ. ޚާއްސަކޮށް އިންކަމް ޓެކްސް އަކީ ޕްރޮގްރެސިވްކޮށް ނެގޭ ރަނގަޅު ޓެކްސް އަކަށް ހަދަންޖެހޭ ކަމަށް އޭނާ ވިދާޅުވިއެވެ.