ކަނޑުގެ ސަރަހައްދުގެ ސަލާމަތާއި ރައްކާތެރިކަމާއި ގުޅޭ ގޮތުން އިންޑިއާއާއި ވިއެޓްނާމާ ދެމެދު ބާއްވާ މަޝްވަރާތަކުގެ 4 ވަނަ ބުރު ހުކުރު ދުވަހު ބާއްވައިފިއެވެ.
ވިއެޓްނާމްގެ ހަނޯއީގައި މިއަހަރު ބޭއްވި މަޝްވަރާތަކުގައި ސަރަހައްދީ ސަލަމަތާއި ރައްކާތެރިކަމާއި، ސަރަހައްދީ ކަނޑުގައި ވިޔަފާރި އިތުރަށް ފުޅާކުރުމާއި ބެހޭ ގޮތުން ދެޤައުމުގެ މެދުގައި މަޝްވަރާކުރެވުނުކަމަށް އިންޑިއާގެ އެކްސްޓަރނަލް އެފެއަރޒް މިނިސްޓްރީއިން މައުލުމާތުދެއެވެ. މީގެ އިތުރުން ކަނޑުގެ ސަރަހައްދުގެ ސައިންޓިފިކް ދިރާސާތައްކުރުމާއި، އިންސާނީ އެހީއާއި ކާރިސާގެ ވަގުތު އެހީތެރިކަން ފޯރުކޮށްދިނުމާ ގުޅޭ ގޮތުންވެސް ދެފަރާތުގެ މެދުގައި މަޝްވަރާކުރެވުނެވެ.
މި މަޝްވަރާތަކުގެ ފަސްވަނަ ބުރު އޮންނާނީ އިންޑިއާގެ ވެރިރަށް ދިއްލީގައި، ދެޤައުމުން އެއްބަސްވާ ތާރީޚެއްގައެވެ.
ދެކުނު ޗައިނާ ކަނޑުގެ މައްސަލައިގައި ވިއެޓްނާމާއި ޗައިނާއާ ދެމެދުވެސް ނުތަނަވަސްކަން އުފެދިފައިވާ މިދަނޑިވަޅުގައި ވިއެޓްނާމްގެ ބޮޑުވަޒީރު ފަމް މިން ޗިން ވަނީ އިންޑިއާއަށް ދަތުރުފުޅެއް ކުރައްވާފައެވެ. އަދި ބޮޑުވަޒީރު ނަރެންދްރަ މޯދީއާ ބައްދަލުކުރައްވައި، ސަރަހައްދީ އަދި ދުނިޔޭގެ އެކި މައްސަލަތަކުގައި މަޝްވަރާކުރައްވައި، ދެޤައުމު ގުޅިގެން މަސައްކަތްކުރެވޭނެ ދާއިރާތަކާ ބެހޭ ގޮތުން ދެ ބޭފުޅުން މަޝްވަރާކުރެއްވިއެވެ.
Advertisement
This content is created and paid for by advertisers and does not involve Voice Journalists
