ލޭނު އަޅައިގެން ބޮޑުކަންނެލީގެ މަސްވެރިކަންކުރަން ހުއްދަ ދިނުމާ ގުޅޭ ގަވާއިދެއް ފިޝަރީސް މިނިސްޓްރީން ހަދައި، އެ ގަވާއިދަށް ޚިޔާލު ހޯދަން ހުޅުވާލުމުން އެކަމާ ކަންބޮޑުވުން ފާޅުކޮށް، އިދިކޮޅު އެމްޑީޕީން ރައްޔިތުންގެ މަޖިލީހަށް މިއަދު ހުށަހެޅު ކުއްލި މައްސަލަ، މަޖިލީހުން ބޭރުކޮށްލައިފިއެވެ.
މި މައްސަލަ ހުށައެޅުއްވީ ކެންދޫ ދާއިރާގެ މެންބަރު މައުރޫފް ޒާކިރުއެވެ.
މައުރޫފްގެ، މައްސަލަ ބަލައިގަތުމަށް ނެގި ވޯޓުގައި ސަރުކާރަށް ނިސްބަތްވާ 47 މެންބަރުން ވަނީ މައްސަލަ ބަލައިނުގަތުމަށް ވޯޓު ދެއްވާފައެވެ. އެ މައްސަލަ ބަލައިގަތުމަށް ވޯޓު ދެއްވީ އެމްޑީޕީގެ 11 މެންބަރުންނެވެ. ވަކިގޮތަކަށް ވޯޓު ނުދޭ އެއް މެންބަރަކު އިންނެވިއެވެ.
އެއާ އެކު އެ މައްސަލަ ވަނީ މަޖިލިސް ތަޅުމުން ބޭރުކޮށްލާފައެވެ.
މައުރޫފް ހުށަހެޅުއްވި ކުއްލި މައްސަލައިގައި ބުނީ، މީގެ ކުރިން ވެސް އެކި ސަރުކާރުތަކުގައި ލޭނު މަސްވެރިކަންކުރުން ހުއްދަކުރަން އުޅުނު ކަމަށާ، ނަމަވެސް، އެކަން ތަންފީޒުކޮށްފައި ނުވަނީ އެކަމުން ލިބޭ ގެއްލުމުގެ ސަބަބުންކަމަށެވެ.
އެގޮތުން، އެކަމަށް ހުއްދަ ދީފިނަމަ ކަނޑުގެ ދިރުންތައް ނެތިދިއުމަށް މަގުފަހިވާނެ ކަމަށާއި، މަސްވެރިކަމުގެ އަމާޒަކަށް ނުވާ އަދި ނެތި ދިއުމުގެ ބިރު އޮތް ދިރުންތަކެއްވެސް މިފަދަ މަސްވެރިކަމުގެ ނުސީދާ ޝިކާރައަކަށްވެދާނެ ކަމަށްވެ.
މިކަމުގެ ސަބަބުން މަސްވެރިކަމުގެ ސިނާއަތަށް ތަފާތު އެކި ގެއްލުންތަކާއި ކުރިމަތިލާން ޖެހިދާނެކަމަށާ އަދި ވަކިން ޚާއްސަކޮށް މި ގައުމުގެ އިގްތިސާދު އެންމެ ބޮޑަށް ބަރޯސާވެފައިވާ ފަތުރުވެރިކަމުގެ ސިނާއަތަށް އެކަމުން ބޮޑެތި އަސަރުތަކެއް ކުރާނެކަން ވަނީ ފާހަގަކުރައްވާފައެވެ.
މީގެ އިތުރުން، ބޮޑުކަންނެލި ލޭނު މަސްވެރިކަން އަލުން ކުރަން ހުއްދަ ދެވިއްޖެނަމަ، ކުރިމަތިވެދާނެ ގެއްލުންތަކާއި އޭގެ ނޭދެވޭ އަސަރުތަކާ ގުޅޭގޮތުން މަސްވެރިންނާއި ފަތުރުވެރިކަމާ ގުޅޭ ފަރާތްތަކާއި އަދި ތިމާވެއްޓާއި ކަނޑުގެ ދިރުންތައް ހިމާޔަތްކުރަން ވަކާލާތުކުރާ ފަރާތްތަކުގެ ކަންބޮޑުވުންތައް ހުރިކަން ވަނީ ފާހަގަކޮށްފައެވެ. އަދި މިކަމުގެ ސަބަބުން މަސްވެރި އާއިލާތަކުގެ އާމްދަނީއަށް ކުރާނެ ނޭދެވޭ އަސަރާއި މެދު ވިސްނުން މުހިންމުކަމަށް މައުރޫފް ވިދާޅުވިއެވެ.
ހަމަ އެހެންމެ، ކޯޓާގެ އުސޫލުން ލޭނު މަސްވެރިކަން ކުރެވޭ އުސޫލުތައް ކަނޑައެޅުމުގެ ސަބަބުން، އެ ކޯޓާގެ ކަޅު ބާޒރެއް ނުސީދާ ގޮތުން އުފެދިގެން ދިއުމަށް މަގުފަހިވާނެކަމެއްކަމަށާ މިކަމުގެ ސަބަބުން މަސްވެރިކަމުގެ މާކެޓު މޮނޮޕޮލައިޒް ކުރުމުގެ ބިރުވެސް އިންތިހާއަށް އޮންނާނެކަމަށް އޭނާ ވިދާޅުވިއެވެ.
އާހިރުގައި މިކަމުގެ މާލީ ގެއްލުން ތަހައްމަލުކޮށް، މަސައްކަތުގެ ހަމަ އަގު ނުލިބި ތިބެން ޖެހޭނީ ދިވެހި އާންމު ބޮޑު ކަންނެލި މަސްވެރިން. ބޮޑު ކަންނެލި ލޭނުގެ މަސްވެރިކަން ހުއްދަ ކުރުމުގެ ސަބަބުން ދިވެހިރާއްޖޭގެ ކަނޑުގެ ވެއްޓާއި، ތިމާވެއްޓަށް އަދި ފަތުރުވެރިކަމުގެ ސިނާއަތަށްވެސް ދިގު ރާސްތާގައި ފޫ ނުބެއްދޭ ވަރުގެ ގެއްލުންތަކެއް ކުރާނެކަމުގައި ދެކެން.
ކެންދޫ ދާއިރާގެ މެންބަރު މައުރޫފް ޒާކިރު
އެހެންކަމުން، ސަރުކާރުގެ މި ނިންމުން މުރާޖައާކޮށް، ލޭނު މަސްވެރިކަމުގެ ހުއްދަ ދޫކުރުމަށް ނިންމާފައިވާ ނިންމުން ބަދަލުކުރުމަށް ވަނީ އޭނާ ގޮވާލާފައެވެ.
Advertisement
This content is created and paid for by advertisers and does not involve Voice Journalists
