ފަލަސްތީނުގެ ރައީސް މަޙްމޫދް އައްބާސް ޣައްޒާއަށް ޒިޔާރަތްކުރުމުގެ ހުއްދަދިނުމަށް އެދި އިސްރާއީލަށް ހުށަހަޅައިފިއެވެ.

މިގޮތުން ފަލަސްތީނުގެ ސަރުކާރުން ވަނީ މި ހުއްދަ ދިނުމަށް އެދި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އަށް ސިޓީއެއް ފޮނުއްވާފައެވެ.

ޢައްބާސް އާއި އެބޭފުޅާގެ ސަރުކާރުގެ އިސްވަފުދެއް ޣައްޒާއަށް ވަޑައިގަތުމަށް ނިންމަވާފައިވާކަން ހާމަކުރައްވާފައިވަނީ މިދިޔަ ހަފްތާގެ ބުރާސްފަތި ދުވަހު ތުރުކީގެ ޕާލިމެންޓުގައި ޢައްބާސް ދެއްވި ތަޤުރޫރުގެ ތެރެއިންނެވެ.

ޢައްބާސް ޣައްޒާއަށް ވަޑައިގަންނަވާނެ ސީދާ ތާރީހެއް މިހާތަނަށް ހާމަވެފައި ނުވި ނަމަވެސް، ބެލެވޭ ގޮތުގައި، އިސްރާއީލުގެ ކަމާބެހޭ އިދާރާތަކުން އައްބާސްގެ ސަލާމަތާއި ރައްކާތެރިކަން ކަށަވަރުކޮށްދިނުމުން އެ ތާރީހު ކަނޑައެޅިގެންދާނެ އެވެ.

މި ޒިޔާރަތުގެ މަޤްޞަދަކީ ޢައްބާސް ވިދާޅުވިގޮތުގައި ޣައްޒާގައި ޔަހޫދީން ހިންގަމުންދާ އަނިޔާވެރިކަމާއި ކުރިމަތިލާން ޖެހިފައިވާ ރައްޔިތުންނާއިއެކު ތިބިކަން ހާމަކޮށްދިނުމެވެ.

މީގެ އިތުރުންވެސް، ފަލަސްޠީނު ދައުލަތާއި ފަލަސްޠީނު ލިބަރޭޝަން އޯގަނައިޒޭޝަން (ޕީއެލްއޯ) އިން ހުރިހާ ފަލަސްޠީނު ސަރަޙައްދުތަކެއްގެ ފުރިހަމަ ޒިންމާ އުފުލާކަން ކަށަވަރުކޮށްދިނުމާއި، ޤައުމީ އެއްބައިވަންތަކަން އަލުން ޤާއިމުކުރުމަށް މަސައްކަތްކުރުމަކީ ވެސް މި ޒިޔާރަތުގެ މަޤްސަދެއްކަމަށް ފަލަސްތީނުގެ ނޫސްތަކުން ރިޕޯޓްކުރެއެވެ.

މި ޒިޔާރަތަށް ތައްޔާރުވުމުގެ ގޮތުން، ޕެލެސްޓީނިއަން ލީޑަރޝިޕުން ދުނިޔޭގެ މުހިންމު ބާރުތަކުގެ ތެރެއިން އދ، އދގެ ސަލާމަތީ މަޖިލީހުގެ މެންބަރުން، އަރަބި އަދި އިސްލާމީ ޤައުމުތައް، އަރަބު ލީގު، އިސްލާމިކް ކޯޕަރޭޝަން އޯގަނައިޒޭޝަން (އޯއައިސީ)، ޔޫރަޕިއަން ޔޫނިއަން، އަދި އެފްރިކާ ޔޫނިއަން ފަދަ ފަރާތްތަކާއި އެކުވެސް ވަނީ މަޝްވަރާތައް ކުރިއަށް ގެންގޮސްފައެވެ.