ޕްރޮސެކިއުޓަރ ޖެނެރަލް (ޕީޖީ) ހުސެއިން ޝަމީމް މަޤާމުން ވަކިކުރުމަށް މަޖިލީޙުގެ ޖަލްސާއެއް މިރޭ ބޭއްވުމަށް ތާވަލްކޮށްފިއެވެ.

މަޖިލީހުގެ ތަޅުމުގައި މިރޭ ބޭއްވުމަށް ހަމަޖެހިފައިވާ ޖަލްސާގައި ޕީޖީކަމުގެ މަޤާމުން ޝަމީމް ވަކިކުރުމަށް ވޯޓަށް އެހުމަށް ވަނީ ނިންމާފައެވެ. 

ޕީޖީ ޝަމީމް މަގާމުން ވަކިކުރުމަށް މިއަދު ޖުޑީޝަރީ ކޮމިޓީން ނިންމާފައިވާއިރު، ޕީޖީ ޝަމީމް މަގާމުން ވަކިކުރަން ހުށަހެޅުއްވީ  ސަރުކާރު ހިންގާ ޕީއެންސީގެ ޕާލިމަންޓްރީ ގްރޫޕުގެ ޑެޕިއުޓީ ލީޑަރު އަދި ހުޅުދޫ ދާއިރާގެ މެންބަރު މުހައްމަދު ޝާހިދެވެ. 

މި މައްސަލައަށް ޖަވާބުދާރީ ވުމަށް މިއަދު ޝަމީމް ޖުޑިޝަރީ ކޮމިޓީ އަށް ވަނީ ހާޒިރުކޮށްފައެވެ.

ކޮމިޓީގެ މި ޖަލްސާ ސިއްރު ނުކޮށް، ޢާންމުންނަށް ހުޅުވާލައިގެން ބާއްވަވައި ދެއްވުމަށް ޕީޖީ ޝަމީމް އެދިވަޑައިގަންނަވާކަމަށް ޕީޖީ އޮފީހުން ބުނި ނަމަވެސް ޕީޖީ ޝަމީމަށް ކުރެވޭ ތުހުމަތުތަކުގައި އެހެން ބައެއް މީހުންގެ ޒާތީ ކަންކަން ހިމެނޭތީ، ޕީޖީއަށް އިހުތިރާމުކުރުމުގެ ގޮތުން ބައްދަލުވުން ސިއްރުކުރުމަށް ކޮމިޓީން ވަނީ ނިންމާފައެވެ.

ޝަމީމްއާ ސުވާލުކުރުމަށް ފަހު ކޮމިޓީން މިއަދު އެ މައްސަލައިގައި ގޮތް ނިންމައިފައިވާއިރު، ޝަމީމް ވަކިކުރަން ނެގި ވޯޓުގައި އޭނާ ވަކިކުރަން 8 މެންބަރުން ތާއީދު ކުރައްވާފައިވާއިރު، ޝަމީމް ވަކިކުރުމާ ދެކޮޅަށް ވޯޓްލީ ދެ މެންބަރުންނެވެ.

އެއީ ހިތަދޫ ދެކުނު ދާއިރާގެ އެމްޑީޕީ މެންބަރު އަދި އެމްޑީޕީ ޕީޖީ ލީޑަރު އިބްރާހިމް ނާޒިލްއާ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު (މަޓޭ) އެވެ.

ޕީޖީ ޝަމީމް މަގާމުން ވަކިކުރަން ޖެހޭކަމަށް ވިދާޅުވެ ޝާހިދު ހުށަހެޅުއްވި ސިޓީގައި މައިގަނޑު އަށް ކަމެއް ވަނީ ފާހަގަކުރައްވައިފައެވެ. އެއީ:

1) ރޭޕުގެ ތުހުމަތުކުރެވުނު ކުރީގެ ޓޫރިޒަމް މިނިސްޓަރު އަލީ ވަހީދުގެ މައްސަލަ ފައިލްކުރުން

2) ކުރީގެ ޔޫތު މިނިސްޓަރު އަހުމަދު މަހުލޫފުގެ މައްސަލަ ފައިލްކުރުން

3) ސަފާރީ ރޭޕް ކޭސް މައްސަލައިގައި ދަށު ކޯޓުން ނިންމި ނިންމުން އިސްތިއުނާފު ނުކުރަން ނިންމުން

4) މިލަންދޫ ދާއިރާގެ ކުރީގެ މެންބަރު އަލީ ރިޒާގެ މައްޗަށް ކްރިމިނަލް ކޯޓަށް ހުށަހެޅި ހިއުމަން ޓްރެފިކިން ދައުވާ އަނބުރާ ގެނައުން

5) ބަނގުރާ ބުއިމުގެ 77 މައްސަލައެއް އަނބުރާ ގެނައުން

6) އެއްޖިންސުން ގުޅުން ހިންގުމުގެ 13 މައްސަލައެއް އަނބުރާ ގެނައުން

7) ޕީޖީ އޮފީހުގެ ޕްރޮސިކިއުޓަރު އަދި ތަރުޖަމާނު އަހުމަދު ޝަފީއުއަށް ކުރެވޭ އެއް ޖިންސުން ގުޅުން ހިންގުމާއި، މަސްތުވާތަކެތި ބޭނުންކުރުމާއި، ރަސޫލާއަށް ފުރައްސާރަ ކުރުމުގެ ތުހުމަތުތަކުގެ މައްސަލަ ބަލަން ދެކޮޅު ހެދުން

8) ވެންޓިލޭޓަރު މައްސަލައިގައި ދައުވާ ނުކުރަން ނިންމުން

މިދިޔަ މަހުގެ އެއްވަނަ ދުވަހު ވެސް އާންމުންގެ ބައެއް މީހުން ވަނީ ޕީޖީ ޝަމީމު މަގާމުން ވަކިކުރަން ގޮވާލައި މަޖިލީހުގެ އިދާރާ ކައިރީ މުޒާހަރާކޮށްފައިއެވެ.