އިންޑިއާއާއި އޮސްޓްރޭލިއާއާ ދެމެދު ވިޔަފާރީގެ ގުޅުން އިތުރަށް ވަރުގަދަކުރުމަށް ބާއްވަމުން އަންނަ ކޮމްޕްރިހެންސިވް އިކޮނޮމިކް ކޯޕަރޭޝަން އެގްރީމެންޓްގެ މަޝްވަރާތަކުގެ 10 ވަނަ ބުރު ނިންމާލައިފިއެވެ.

ނިމިދިޔަ ހަފްތާގައި އޮސްޓްރޭލިއާގެ ސިޑްނީގައި ބޭއްވި މަޝްވަރާތަކުގައި އެކި ދާއިރާތަކުން ވިޔަފާރީގެ ގުޅުން ބަދަހިކުރުމާ ބެހޭ މަޝްވަރާތައް ކުރިއަށް ދިޔައެވެ. އެގޮތުން ދެޤައުމުގެ ސަރުކާރަށް ތަކެތި ޕްރޮކިއަރ ކުރުމާއި ބެހޭ ގޮތުންނާއި، ޓެކްނޮލޮޖީއާ ރައްޓެހި ދަނޑުވެރިކަމާއި، އެނޫންވެސް އެކި ދާއިރާތަކުން ގުޅުން ބަދަހިކުރުމަށް މަޝްވަރާކުރެވުނެވެ. އިންޑިއާ ސަރުކާރުން ބުނީ ދެޤައުމުން ހުށަހެޅި ކަންކަމާއިމެދު މަޝްވަރާކޮށް، ދެފަރާތް އެއްބަސްވާ މިސްރާބަކަށް ކަންކަން ގެންދިޔުމާ ބެހޭ ގޮތުން މަޝްވަރާކުރިއިރު، ދެޤައުމުންވެސް އެ ދެޤައުމުގެ އެތެރޭގެ ޙާލަތަށް ރިއާޔަތްކުރިއެވެ. އެގޮތުން ވިޔަފާރީގެ އެއްބަސްވުންތަކުގެ ސަބަބުން ދެޤައުމުގެ އެތެރޭގެ ވިޔަފާރިއާއި ސިޔާސަތުތަކަށް އައިސްދާނެ ބަދަލުތަކަށް ރިއާޔަތްކުރިކަމަށްވެސް އިންޑިއާއިން ބުނެއެވެ.

މި މަޝްވަރާތަކުގެ އެންމެ ފަހު ބުރު ބާއްވާފައިވަނީ އިންޑިއާގެ ދިއްލީގައި މިދިޔަ ޖޫން މަހުއެވެ. ޖޫން މަހުގެ މަޝްވަރާތަކަށްފަހު، މިދިޔަ ހަފްތާގައި ބޭއްވި މަޝްވަރާތަކަށް މަޝްވަރާ މޭޒުދޮށަށް އައުމުގެ ކުރިން ދެޤައުމުގެ އޮފިޝަލުން މޭޒަށް ގެންނާނެ މައްސަލަތައް ފައިނަލްކުރުމަށް އިތުރު 2 ބައްދަލުވުމެއްވެސް ބާއްވާފައެވެ.

Advertisement

އަންނަ އަހަރުގެ މެއި މަހު އޮސްޓްރޭލިއާގެ އާއްމު އިންތިޚާބު އޮންނައިރު، އެޤައުމުން ބޭނުންވަނީ އިންތިޚާބުގެ ކުރިން، މިއަހަރުގެ ނިޔަލަށް މި މަޝްވަރާތައް ނިންމާލައި، އެއްބަސްވުމަކަށް އައުމަށްކަމަށް މަސްދަރުތަކާ ހަވާލާދީ އިންޑިއާގެ މީޑިއާއިން ރިޕޯޓްކުރެއެވެ.

އިންޑިއާއާ އޮސްޓްރޭލިއާ އާ ދެމެދު ވިޔަފާރީގެ އައު މަޝްވަރާތަކެއް ފެށިފައިވަނީ 2022 ވަނަ އަހަރު ދެޤައުމުގެ މެދުގައި ސޮއިކުރެވުނު އިކޮނޮމިކް ކޯޕަރޭޝަން އެންޑް ޓްރޭޑް އެގްރިމެންޓްގެ ދަށުންނެވެ. އެގޮތުން މަޝްވަރާތަކުގެ ފުރަތަމަ ބުރު ބާއްވާފައިވަނީ 2023 ވަނަ އަހަރުގެ ފެބްރުއަރީ މަހުގެ ތެރޭގައެވެ.