ވެލާނާ އިންޓަރނޭޝަނަލް އެއާޕޯޓުން ގަވައިދާ ހިލާފަށް 80,000އަށްވުރެ ގިނަ ޑޮލަރު ހިފައިގެން ބަންގްލަދޭޝްއަށް ފުރަން އުޅުނު އެޤައުމަށް ނިސްބަތްވާ މީހާގެ ބަންދަށް 15 ދުވަސް ޖަހައިފިއެވެ.

މި މައްސަލާގައި އޭވިއޭޝަން ކޮމާންޑުން މިމަހު 25 ވަނަ ދުވަހު ހިފަހަށްޓައި ބަލައި ފާސްކުރީ ބަންގްލަދާެޝް މީހެއް ކަމަށްވާ ޝަހްމިން އިސްލާމް ޝަގުރް އެވެ.

އޭނާގެ މައްޗަށް ތުހުމަތު ކުރެވޭ މަނީ ލޯންޑަރިންގ ގެ މައްސަލަ ފުލުހުން އަންނަނީ ބަލަމުންނެވެ.

Advertisement

އޭވިއޭޝަން ސެކިއުރިޓީ ކޮމާންޑުން އެދުވަހު އެކްސްގައި ކުރި ޕޯސްޓެއްގައި ބުނެފައިވަނީ،  ޑާކާއަށް ފުރަން އުޅުނު ބަންގްލަދޭޝް ރައްޔިތެއްގެ އަތުން ގަވާއިދާ ޚިލާފަށް ރާއްޖެއިން ބޭރުކުރަން އުޅުނު 81,030 އެމެރިކާ ޑޮލަރު އަތުލައިގެންފައިވާކަމަށެވެ. މިއީ ދިވެހި ރުފިޔާއިން ބަލާނަމަ ގާތްގަނޑަކަށް 1.2 މިލިއަން ރުފިޔާއެވެ. 

މި މީހާ ފުރަން ހަމަޖެހިފައި އޮތީ ބަންގްލަދޭޝްގެ ބަންގްލާ އެއާލައިން ފްލައިޓް ނަންބަރު BS338 ފްލައިޓުންނެވެ.

ޑޮލަރުތައް ހުރިކަން އެނގުނީ އެމީހާގެ ފޮށި ބަލައި ފާސްކުރުމުގެ ތެރޭގައި ކަމަށާ، މި ފައިސާ އޭނާ ވަނީ ފޮށިތެރޭގައި ނުފެންނާނެހެން ވަރަށް ރަނގަޅަށް ރައްކާކޮށްފައި ކަމަށް ބުނެފައިވެއެވެ.