ޣައްޒާއަށް ޕޯލިއޯ ވެކްސިން ފޯރުކޮށްދިނުމަށްޓަކައި، ޔަހޫދީ ސިފައިން ހިންގަމުންގެންދާ ގަތުލު އާއްމުތައް މެދުކަނޑާލުމަށް އެއްބަސްވެފައިވާކަމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ހާމަކޮށްފިއެވެ. 

ޑަބްލިއުއެޗްއޯގެ އިސް އޮފިޝަލެއް ކަމުގައިވާ ރިކް ޕީޕަރކޯން ބައެއް މީޑިއާތަކާ ވާހަކަދައްކަވަމުން ވިދާޅުވެފައިވަނީ، ޣައްޒާގައި ދިރިއުޅޭ ގާތްގަނޑަކަށް 640،000 ކުދިންނަށް ވެކްސިން ދިނުމުގެ މަގްސަދުގައި އާދިއްތަ ދުވަހު ކެމްޕޭނެއް ފެށުމަށް ހަމަޖެހިފައިވާ ކަމަށެވެ.

މި ކެމްޕޭން ކުރިއަށްދާނީ ތިން މަރުޙަލާއަކަށް ބަހާލައިގެން، ޣައްޒާގެ މެދު، ދެކުނު އަދި އުތުރު ސަރަޙައްދުތަކުގައެވެ. އޮފިޝަލް ވިދާޅުވީ، ކޮންމެ މަރުޙަލާއެއްގައިވެސް، ވިދިވިދިގެން ތިން ދުވަހު، ރޭގަނޑު 6:00 އިން މެންދުރުފަހު 3:00 އާއި ހަމައަށް ޣައްޒާގައި ޔަހޫދީން ހިންގާ އުދުވާން ހުއްޓާލާނެ ކަމަށް އެމީހުން އެއްބަސްވެފައިވާކަމަށެވެ.

އެ މުއްދަތުގެ ތެރޭގައި ވެކްސިންދީ ނުނިމިއްޖެނަމަ، އިތުރު ދުވަހެއްގައި ވެކްސިން ދިނުމަށްޓަކައި، ގަތުލުއާއްމު ހުއްޓުމަކަށް ގެނައުމަށް އެއްބަސްވުމެއް ވަނީ ގާއިމުކޮށްފައެވެ.

ޔަހޫދީން މިފަދައިން އަމަލުކުރާނެ ކަމަށް އެއްބަސްވެފައިވަނީ، 25 އަހަރު ފަހުން ޣައްޒާގައި ފެނުނު ފުރަތަމަ ޕޯލިއޯ ކޭސްގައި 10 މަސް ދުވަހުގެ ކުއްޖެއްގެ ހަށިގަނޑުގެ ބައެއް ވާގިނެތިފައިވާކަމަށް އދ. ގެ އޮފިޝަލުން ހާމަކުރިތާ މާގިނަ ދުވަސްތަކެއް ނުވަނީހެވެ.

ޑަބްލިއުއެޗްއޯއިން ބުނީ މިހާރުވެސް ގާތްގަނޑަކަށް 1.26 މިލިއަން ޑޯޒް އައު އޯރަލް ޕޯލިއޯ ވެކްސިން ޓައިޕް 2 (އެން.އޯ.ޕީ.ވީ 2) ޣައްޒާއަށް ފޯރުކޮށްދެވިފައިވާ ކަމަށާއި، އިތުރު 400،000 ޑޯޒް އަވަހަށް ލިބޭނެ ކަމަށެވެ.

ވެކްސިން ޖެހުމުގެ މަސައްކަތް ކުރިއަށް ގެންދާނީ އދ. ގެ މުވައްޒަފުންނާއި ޣައްޒާގެ ސިއްޙީ މަސައްކަތްތެރިން ގުޅިގެންނެވެ. ވެކްސިން ދިނުމަށްޓަކައި 2،000 އަށްވުރެ ގިނަ ސިއްޙީ އަދި މުޖުތަމަޢުގެ އައުޓްރީޗް މުވައްޒަފުން ވަނީ ތަމްރީނުކޮށްފައެވެ.

ޣައްޒާއަށް ޕޯލިއޯ ވެކްސިން ފޯރުކޮށްދިނުމަށްޓަކައި، ޔަހޫދީ ސިފައިން ހިންގަމުންގެންދާ ގަތުލު އާއްމުތައް މެދުކަނޑާލުމަށް ޔަހޫދީ ސިފައިން އެއްބަސްވިނަމަވެސް މިކަމުގައި ޔަހޫދީ ސިފައިންނަށް ފުރިހަމަ އިތުބާރު ނުކުރާނޭކަމަށް މެދުއިރުމަތީގެ ބައެއް މީޑިއާތަކާ ހަވާލާދީ އިންސާނިއްޔަތަށް މަސައްކަތްކުރާ ބައެއް ޖަމިއްޔާތަކުން ވަނީ ބުނެފައެވެ. ސަބަބަކީ މީގެ ކުރިންވެސް ކުރިއަށްގެންދިޔަ މިފަދަ ކެމްޕެއިންތަަކަށް ޔަހޫދީ ސިފައިން އޮޅިގެން ނަމަވެސް ހަމަލާދީފައިވާތީކަމަށް އެފަރާތްތަކުން ފާހަގަކުރެއެވެވ