ފަލަސްތީނުގެ ޣައްޒާގައި ދިރިއުޅެމުންދާ ކުޑަކުދިންނަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ޕޯލިއޯ ވެކްސިން ދޭން ފަށައިފިއެވެ.

ޑަބްލިއުއެޗްއޯއިން ޕޯލިއޯ ވެކްސިން ދޭން ފަށާފައިމިވަނީ، މި ކެމްޕޭނަށްޓަކައި ގަތުލުއާއްމު ހުއްޓާލުމަށް ޔަހޫދީން އެއްބަސްވި މުއްދަތަށް ވުރެ 1 ދުވަސް ކުރިން ކަމަށް ޣައްޒާގެ ހެލްތު މިނިސްޓްރީން ރިޕޯޓްކުރެއެވެ.

އެސޯސިއޭޓެޑް ޕްރެސް އެޖެންސީން ރިޕޯޓް ކުރާ ގޮތުގައި، މި ވެކްސިންގެ ޑޯޒްތައް ޚާން ޔޫނިސް ގައި ހުންނަ ނާސިރު ހޮސްޕިޓަލުގައި އިއްޔެ ވަނީ ދޭން ފަށާފައެވެ.

Advertisement

ތިން ދުވަހުގެ މުއްދަތަށް ކުރިއަށްދާ މި ވެކްސިން ދިނުމުގެ ކެމްޕޭނުގެ އަމާޒަކީ 640،000 ވަރަކަށް ފަލަސްތީނު ކުދިންނަށް ވެކްސިން ދިނުމެވެ.

މި ކެމްޕޭން ކުރިއަށްދާނީ ތިން މަރުޙަލާއަކަށް ބަހާލައިގެން، ޣައްޒާގެ މެދު، ދެކުނު އަދި އުތުރު ސަރަޙައްދުތަކުގައެވެ. މިކަމާއި ގުޅޭގޮތުން ޑަބްލިއުއެޗްއޯގެ އޮފިޝަލަކު ވިދާޅުވީ، ކޮންމެ މަރުޙަލާއެއްގައިވެސް، ވިދިވިދިގެން ތިން ދުވަހު، ރޭގަނޑު 6:00 އިން މެންދުރުފަހު 3:00 އާއި ހަމައަށް ޣައްޒާގައި ޔަހޫދީން ހިންގާ އުދުވާން ހުއްޓާލާނެ ކަމަށް އެމީހުން އެއްބަސްވެފައިވާކަމަށެވެ.

އެ މުއްދަތުގެ ތެރޭގައި ވެކްސިން ދީ ނުނިމިއްޖެނަމަ، އިތުރު ދުވަހެއްގައި ވެކްސިން ދިނުމަށްޓަކައި، ގަތުލުއާއްމު ހުއްޓުމަކަށް ގެނައުމަށް އެއްބަސްވުމެއް ވަނީ ގާއިމުކޮށްފައެވެ.

ޔަހޫދީން މިފަދައިން އަމަލުކުރާނެ ކަމަށް އެއްބަސްވެފައިވަނީ، 25 އަހަރު ފަހުން ޣައްޒާގައި ފެނުނު ފުރަތަމަ ޕޯލިއޯ ކޭސްގައި 10 މަސް ދުވަހުގެ ކުއްޖެއްގެ ހަށިގަނޑުގެ ބައެއް ވާގިނެތިފައިވާކަމަށް އދ. ގެ އޮފިޝަލުން ހާމަކުރިތާ މާގިނަ ދުވަސްތަކެއް ނުވަނީހެވެ.