މާލޭގައި އަންހެނަކު ރަހީނުކުރި މައްސަލައާއި ގުޅިގެން ފުލުހުންގެ ބަންދުގައި ހުރި އަތުހަރު އަމިއްލައަށް މަރުވާން މަސައްކަތް ކުރުމާ ގުޅިގެން އޭނާ ބަހައްޓާފައިހުރި ދޫނިދޫ ޖަލުން އައިޖީއެމްއެޗް ހޮސްޕިޓަލާއި ހަމައަށް ގެންދިޔުމަށް ހޭދަވީ 23 މިނެޓްކަމަށް ފުލުހުން ހާމަކޮށްފިއެވެ.

ފުލުހުންގެ ބެލުމުގެ ދަށުގައި ކ. ދޫނިދޫގައި އަތުހަރު ހުއްޓާ އޭނާ ދަންޖެހިގެން މަރުވާން މަސައްކަތް ކުރީ ރޭގެ ވަގުތެއްގަ އެވެ. އެއާއިއެކު، އޭނާ އަށް އައިޖީއެމްއެޗްގެ ވެންޓިލޭޓަރުގައި އަންނަނީ ފަރުވާ ދެމުންނެވެ.

މިކަމާއި ގުޅިގެން ފުލުހުން އާއްމުކޮށްފައިވާ ޓައިމްލައިނުގައިވާގޮތުން:

* އަތުހަރު ދަންޖެހިފައިވާ މަންޒަރު ފެނުން - 19:02 

* ޖަލު ގޮޅު ހުޅުވައި އަތުހަރު ބިންމަތީގައި ބޭއްވުން - 19:02

* އަތުހަރު ސްޓްރެޗަރ އަށް ލައިގެން ގޮޅިން ނެރުން - 19:05

* ދޫނިދޫ ކްލިނިކަށް ގެންދިޔުން އަދި ޑޮކްޓަރު އަތުހަރުގެ ހާލަތު ބެލުން - 19:06

* އަތުހަރު އެމަޖެންސީގައި ލޯންޗުގައި މާލެ ގެންދިއުން - 19:14

* އައިޖީއެމްއެޗްއަށް ގެންދިޔުމަށް އެމްބިއުލަންސަށް އެރުވުން - 19:17

* އައިޖީއެމްއެޗްގެ އެމަޖެންސީއަށް ގެންދިއުން - 19:25

ފުލުހުންގެ ތަރުޖަމާނު އަޙްމަދު ޝިފާން މަޢުލޫމާތު ދެއްވިގޮތުގައި، މި މައްސަލައިގައި ނޭޝަނަލް އިންޓެގްރިޓީ ކޮމިޝަނާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން ވަކިވަކިން ތަޙުޤީޤު ފަށައިފައިވާ ކަމަށެވެ.

ބުރާސްފަތި ދުވަހުގެ ރޭ ހިނގި ރަހީނުކުރުމުގެ ހާދިސާގައި އަތުހަރުގެ ލޯބިވެރިޔާކަމަށް ބުނާ އަންހެން މީހާއަށް ވަޅިން ބިރުދެއްކުމުގެ ކުރިން އެކި ފަހަރުމަތިން އަތުހަރު ވަނީ އޭނާއަށް އަނިޔާކޮށްފައެވެ. އޭގެ ފަހުން އަތުހަރު ވަނީ އަންހެންމީހާއަށް ވަޅިން ބިރުދެއްކުމަށްފަހު ސައިކަލުގައި އޭނާ ދާން ބޭނުންވާ ތަނަށް ދިއުމަށް މަސައްކަތްކޮށްފައެވެ. އޭރުވެސް ފުލުހުން ދިޔައީ އަންހެންމީހާ ސަލާމަތްކުރުމަށް އެކި ގޮތްގޮތުން މަސައްކަތްކުރަމުންނެވެ.

ނަމަވެސް، ވަކި ހިސާބަކުން ފުލުހުން ވަނީ ހުށިޔާރުކަމާއެކު އަންހެންމީހާ ސަލާމަތްކޮށްފައެވެ. މިކަމުގެ ތެރޭގައި ދެމީހުންނަށް އަނިޔާވެ ހޮސްޕިޓަލަށް ވަނީ ގެންގޮސްފައެވެ. ނަމަވެސް އަންހެންމީހާއަށް މާބޮޑު އަނިޔާތަކެއް ނުލިބެއެވެ. އަތުހަރަށް ލިބުނު އަނިޔާތަކާ ގުޅިގެން އެންމެފުރަތަމަ އޭނާއަށް ފަރުވާދީފައިވަނީ އޭޑީކޭއަށް ގެންގޮސްގެންނެވެ.

އެހެންނަމަވެސް، ހައްޔަރު ކޮށްފައި ހުއްޓާ އޭނާ ހޮޑުލާތީ ފަރުވާދިނުމަށް ފަހުން އައިޖީއެމްއެޗަށް ގެންދިޔައީއެވެ. މި ހާދިސާގައި އަންހެންމީހާ ރަހީނުކުރި އަތުހަރަކީ ކުށުގެ ރެކޯޑް އޮންނަ މީހެކެވެ. ޖަލުގައި ހުކުމް ތަންފީޒުކުރަމުން ދަނިކޮށް އަތުހަރު ސަލާމަތްވީ މިދިޔަ ސަރުކާރުގެ ދުވަސްވަރު އޭނާއަށް ރައީސް އަފްއާމް ދެއްވުމުންނެވެ.