އިސްރާއީލުގެ ހައްދުފަހަނައަޅާފައިވާ ބޮޑުވަޒީރު ބެންޖަމިން ނަތަންޔާހޫ، ގަތުލުއާއްމު ހުއްޓާލަން މަސައްކަތް ނުކުރާކަމަށް ބުނެ، އެމެރިކާގެ ރައީސް ޖޯ ބައިޑެން ފާޑުވިދާޅުވެއްޖެއެވެ.

ޣައްޒާގެ ގަތުލުއާއްމު ހުއްޓުވުމާއި ގުޅޭ މަސައްކަތްތައް ކުރާ ފަރާތްތަކާއި ބައްދަލުކުރުމަށް ވައިޓް ހައުސް އަށް ވަޑައިގެން ނޫސްވެރިންނާއި ބައްދަލުކުރައްވައި، ބައިޑެން ވިދާޅުވީ، މި އުދުވާންތައް ހުއްޓުވުމާއި އަސީރުން ދޫކޮށްލުމަށް ކުރެވޭ މަސައްކަތުގެ އެއްބަސްވުމެއްގެ އެންމެ ފަހުގެ ޑްރާފްޓެއް ހުށަހެޅުމާ ކައިރިވެފައިވާ ކަމަށެވެ.

ޙަމާސް ޖަމާޢަތުގެ މުޖާހިދުން ރަހީނު ކޮށްފައިވާ އަސީރުންގެ ތެރެއިން މަރުވެފައިވާ ހަ މީހެއްގެ ހަށިގަނޑުގެ ތެރެއިން އެމެރިކާއަށް ނިސްބަތްވާ ރައްޔިތަކުވެސް ފެނިފައިވާ ދަނޑިވަޅެއްގަައި، މި ބައްދަލުވުމުގެ ތެރެއިން، ނެތަންޔާހޫ އެއްބަސްވުމަކަށް އާދެވޭތޯ އެކަށީގެންވާ މަސައްކަތްތަކެއް ކުރަމުންދޭތޯ ސުވާލުކުރުމުން، ބައިޑެން ވަނީ އެފަދައިން ނަތަންޔާހޫ މަސައްކަތް ނުކުރާ ކަމަށް ބުނެފައެވެ.

Advertisement

ނަތަންޔާހޫއާ ދެކޮޅަށް ބައިޑަން މި މޭރުމުން ވާހަކަދެއްކި ނަމަވެސް, އެ ކަމުގެ ތަފުސީލެއް ނުދެއެވެ.

ޢުދުވާންތައް ހުއްޓުމަކަށް ގެންނަން ކުރަމުންދާ މަޝްވަރާތަކުގައި އެމެރިކާއިން ބައިވެރިވި ނަމަވެސް, އެމީހުންނަކީ އިސްރާއީލަށް ހަތިޔާރާއި އެނޫންވެސް އެހީތެރިކަން ފޯރުކޮށްދިނުމުގައި، އެންމެ ގާތް ބައިވެރިޔާކަން ފާހަގަކޮށްލަން ޖެހެއެވެ.

މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހު ޔަހޫދީން ޣައްޒާއަށް ދޭން ފެށި ލާއިންސާނީ ހަމަލާތައް މެދުކަނޑާލާފައި ނުވާއިރު، މި ހަމަލާތަކުގައި މިހާތަނަށް 40,786 މީހުން ޝަހީދުވެ 94,224 މީހުން ވަނީ ޒަހަމް ވެފައެވެ.