ފުލުހުންގެ ބެލުމުގެ ދަށުގައި ހުންނަ މީހަކަށް ގެއްލުންވާ ކަމެއް ނުވާނެކަމުގެ ކަށަވަރުކަމެއް ދޭން ޖެހޭކަމަށް ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ވިދާޅުވެއްޖެއެވެ.

ޕީޕަލްސް ނެޝަނަލް ފްރަންޓު (ޕީއެންއެފް)އިން ރޭ ކުރިއަށް ގެންދިޔަ ޖަލްސާގައި ވާހަކަދައްކަވަމުން ރައީސް ޔާމީން ވިދާޅުވީ، ފުލުހުންނަކީ އަމަން ބެލެހެއްޓުމަށްޓަކައި ރައްޔިތުންނާ އެންމެ ގާތުން ގާނޫނު ތަންފީޒުކުރަން މަސައްކަތް ކުރާ ފަރާތް ކަމަށްވީ ނަމަވެސް، ފުލުހުންގެ ބައެއް އަމަލުތައް ހުންނަ ގޮތުން، އެ އަމަލުތަކުގައި ނުބައި ނިޔަތެއް ނެތަސް ވަރަށް ނުރައްކާތެރި ހާލަތްތައް ދިމާވާ ކަމަށެވެ.

އެގޮތުން، ރައީސް ޔާމީން ވިދާޅުވީ، އެސްއޯޕީގެ ބޭރުން ކަންތައް ކުރުމުގެ ނަތީޖާއެއްގެ ގޮތުން ނުބައި ނަތީޖާއެއް ނުނިކުންނާނެކަމާއި، ފުލުހުންގެބެލުމުގެ ދަށުގައި މީހަކު ހުއްޓާ، ގުދުރަތީ ގޮތުން މީހަކަށް ކަމެއް ދިމާވާ ސިއްހީ ނުރައްކާތެރިކަމެއް ދިމާވުން ފިޔަވައި ފުލުހުންގެ އިހުމާލުން ކުރާ ކަމަކުން މީހާއަށް ގެއްލުންނުވާނެ ކަމުގެ ކަށަވަރުކަމެއް ދޭން ޖެހޭ ކަމަށެވެ.

ފުލުހުން ކުރާ ކަންތައްތަކުގައި ނުބައި ނިޔަތެއް ނެތި ވެސް، ގޯސްކޮށް ކަމެއް ކުރެވިދާނެ ކަމަށާއި ކަމެއްގެ ނަތީޖާ ގޯސްވެއްޖެ ނަމަ، ޖިނާއީ ލައިބިލިޓީ ބޮލުގައި އަޅަން ޖެހޭކަމަށް ވެސް ރައީސް ޔާމީން ވިދާޅުވިއެވެ.

މިދިޔަ ބުރާސްފަތި ދުވަހުގެ ރޭ ހިނގާދިޔަ އަންހެނަކު ރަހީނު ކުރުމުގެ ހާދިސާ އަށް އިޝާރާތްކުރައްވާ ރައީސް ޔާމީން ވިދާޅުވީ، އެ މައްސަލައިގައި ޝާމިލުވާ އަތުހަރު ހިންގަން އުޅުނީ ވަރަށް ނުބައި ޖަރީމާއެއް ކަމަށްވީ ނަމަވެސް، ކަންކަން ދިޔަގޮތުން އޭނާ ނިޔާވެފައިވާ ކަމަށެވެ.

އަތުހަރު ދޫނިދޫ ޖަލުގައި އަމިއްލަ އަށް މަރުވާން މަސައްކަތްކުރުމާއި ގުޅިގެން ހާލުދެރަވެ، ވެންޓިލޭޓަރުގައި ފަރުވާ ދެމުންދަނިކޮށް ނިޔާވީ އިއްޔެގެ ވަގުތެއްގައެވެ.

 އަތުހަރު މަރުވި ގޮތް ހޯދަން އޮޓޮޕްސީއެއް ހަދަން ފުލުހުން ނިންމާފައިވާއިރު، މިނިވަން މުއައްސަސާތަކުން ވެސް އަންނަނީ މިކަން ހިނގި ގޮތް ތަހުގީގު ކުރަމުންނެވެ.