Advertisement
މުސްލިމުން މާތް ބަޔަކަށް ވާނީ އެ މީހުންގެ ޙަޔާތުން މާތްކަން ދައްކަންޏާ: ރައީސް މުޢިއްޒު
މުސްލިމުން މާތް ބަޔަކަށް ވާނީ އެ މީހުންގެ ޙަޔާތުން އެ މީހުންގެ މާތްކަން ދައްކާނަމަ ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.
ގައުމީ ދުވަހުގެ ރަސްމީ ޖަލްސާގައި ވާހަކަ ދައްކަވަމުން ރައީސް މުޢިއްޒު ވަނީ، މިއަދަކީ ދިވެހިން ބަހަށް އިސްކަންދޭން ފަށާ ދުވަހަކަށް ހެދުމަށް އެދިވަޑައިގެންފައެވެ. އަދި ދިވެހި ބަހުން މުޢާމަލާތްކޮށް ދިވެހި ޘަގާފަތް ދިރުވާއިރު، އެކަމުގައި އިސްލާމްދީނުގެ މިންތަކާއި އިންތަކަށް ފަޚްރުވެރިވުމަށް އެދުވަޑައިގެންފައެވެ.
ދިވެހި ގައުމިއްޔަތުގެ މަދަކީ މާތްވެގެންވާ އިސްލާމްދީން. ދީނީ ކަންކަން ހަރުދަނާކޮށް މަގުތައް ފަހިކުރުމަކީ އަޅުގަނޑުމެންގެ އަމާޒެއް. ޒަކާތް ދިނުމުގެ ނިޒާމް ހަރުދަނާކުރުމަށް ޒަކާތު ހައުސް އުފެއްދީ އެހެންވެގެން. ދައުލަތުގެ ޚަރަދުގައި ހައްޖަށް ދިޔުމުގެ ފުރުސަތު ފަޤީރުންގެ މެދުގައި ހުޅުވާލީ އެހެންވެގެން. ގުރުއާން ހިތުދަސް ހާފިޒުންގެ އަދަދު މުޅިރާއްޖޭގައި އިތުރުކުރުމަށް، ހާފިޒުކަމުގެ ޕްރޮގްރާން ފުޅާކުރަމުން މިދަނީވެސް މި ސަބަބަށް. ޒުވާން ޚަތީބުން އުފައްދަމުން، އިމާމުން ރާއްޖެއިން ބޭރަށް ފޮނުވައި، ތަމްރީނުދީ ތާޒާ ކުރަމުން، އިސްލާމީ ޔުނިވާސިޓީގެ ކޯސްތައް އަތޮޅުތެރެއަށް ފުޅާކުރަމުން މިދަނީވެސް މި މަތިވެރި މަގުސަދުގައި.
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
މީގެ އިތުރުންވެސް، އިސްލާމީ އުއްމަތުގެ ބޮޑެތި ޢިލްމުވެރިންގެ ފޮތްތައް ދިވެހި ބަހަށް ތަރުޖަމާ ކުރެވެމުންދަނީ، ސައްތައިން ސައްތަ މުސްލިމް ގައުމެއްގެ ގޮތުގައި ރާއްޖެ ދާއިމަށް ބޭއްވުމަށް ކަމަށް އެމަނިކުފާނު ވިދާޅުވިއެވެ.
މިއާއެކު ރައީސް މުޢިއްޒު ވަނީ އިސްލާމްދީނުގައި މާތް އަޚްލާގަށް އިސްކަންދެވިފައިވާ މިންވަރަށް އަލިއަޅުވާލައްވާފައެވެ.
ދިވެހި އައިޑެންޓިޓީގެ ވާހަކަ ދައްކާއިރު، މިއީ އަޅުގަނޑު ވަރަށް ބާރުލާން ބޭނުންވާ ނުކުތާއެއް. އިސްލާމްދީން ބުނަނީ އެކަކު އަނެކަކަށް ހެޔޮބަހެއް ނޫނީ ނުބުނާށޭ. ބުނާނެ ހެޔޮބަހެއް ދުލަށް ނާތުވެއްޖެއްޔާ ހަނު ހުންނާށޭ. އިސްލާމްދީން ބުނަނީ ހެޔޮ ކަންކަމަށް އަމުރު ކުރާށޭ. ނުބައި ކަންކަން ނަހީކުރާށޭ. އިސްލާމްދީން ބުނަނީ ދުވަސްވީ މީހުންނަށް ގަދަރުކޮށް ލުޑަކުދިންނަށް ކަމޭހިތާށޭ. އިސްލާމްދީން ބުނަނީ އަމިއްލަ ނަފްސުގެ އަގު އުފުލައި، އަންހެނަކަސް ފިރިހެނަކަސް އިއްފަތްތެރިކަމާ އަދަބުވެރިކަމާއެކު ލަދުވެތިކަމުގެ ފޭރާމުން ޒީނަތްތެރިވާށޭ. ބަދުއަޚްލާގީ ލަދު ހުތުރު އާދަތަކުން ދުރުހެލިވާށޭ.
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
ކަންމިހެން ހުރި ނަމަވެސް އަދުގެ މުޖުތަމަޢުއިން މިކަންކަން ނުފެންނަކަން ފާހަގަކުރައްވައި ރައީސް މުޢިއްޒުވަނީ ކީރިތި ގުރުއާނުން އެނގެނީ މުސްލިމުންނަކީ މާތް ބައެއްކަމަށާ، އެފަދަ މުސްލިމު ބަޔަކަށް މުސްލިމުންނަށް ވެވޭނީ ޢަމަލުންވެސް މާތް ވެގެން ކަަމަށް ވިދާޅުވެފައެވެ.
މުސްލިމުން މާތް ބަޔަކަށް ވާނީ އެ މީހުންގެ ޙަޔާތުން އެ މީހުންގެ މާތްކަން ދައްކަންޏާ. ހެޔޮ ކަންކަމަށް އަމުރުކުރަންޏާ. ނުބައިކަންކަން ނަހީކުރަންޏާ. ފުރިހަމަ މުސްލިމެއްގެ ގޮތުގާ ދިރިއުޅުމުގެ ކޮންމެ ކަމެއް ބައްޓަންކުރަމުން ގެންދަންޏާ
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
ރައީސް މުޢިއްޒު ވިދާޅުވީ، ދިވެހިންގެ ޢަމަލުން ދިވެހިންނަކީ މާތް ބައެއްކަން ދެއްކި އިރު ގައުމު އޮތީ ވަރަށް އުފާވެރިކޮށް ކަމަށެވެ. އެފަދަ ދިވެހިރާއްޖެއަކަށް މި ދިވެހި ރާއްޖެ އަލުން އިއާދަކުރައްވަން ބޭނުންފުޅުވާކަން ފާހަގަކުރައްވައި ރައީސް މުޢިއްޒުވަނީ އެކަމުގައި ދިވެހިންގެ އެއްބާރުލުން ދެއްވުމަށް އެދިވަޑައިގެންފައެވެ.
Advertisement
Advertisement
Advertisement
This content is created and paid for by advertisers and does not involve Voice Journalists
Advertisement
