އިންޑިއާގެ އަވަށެއް ކަމަށްވާ އުއްތަރަޕްރަދޭޝްގެ މީހުންނަށް، ހާއްސަކޮށް ކުޑަކުދިންނަށް ހަމަލާދޭ ހިޔަޅުތަކެއް ފާހަގަކުރެވިއްޖެއެވެ.

50,000 އަށް ވުރެ ގިނަ މީހުންގެ އާބާދީއެއް އޮންނަ މި އަވަށުގައި މި ހިޔަޅުތައް މިހާތަނަށް 7 ކުޑަކުދިންނާއި 1 އަންހެނަކަށް ހަމަލާދީ މަރާލާފައިވާއިރު، އެ އަށުގެ އާއްމުން މިހާރު ތިބީ ވަރަށް ބޮޑު ކަންބޮޑުވުމެއްގައެވެ.

ހިޔަޅުތަކުގެ ހަމަލާއެއްގައި މަރުވި 4 އަހަރުގެ ސަންދްޔާގެ މަންމަ ބުނި ގޮތުގައި އެރޭ ސަންދްޔާ ގޭގެ ބޭރުގައި ނިދާފައި އޮއްވާ މުޅި އަވަށުން ކަރަންޓު ދިޔައެވެ. ސަންދްޔާގެ މަންމަ ބުނީ ހިޔަޅުތައް ސަންދްޔާއަށް ހަމަލާދީފައިވަނީ ކަރަންޓު ދިޔަތާ 2 މިނިޓް ތެރޭގައެވެ. ވާނުވާ އެނގުނުއިރު، ސަންދްޔާ ގެންގޮސްފައިވާކަމަށް ވެސް އޭނާ ބުންޏެވެ.

Advertisement

އޭގެ ފަހުން ސަންދްޔާގެ ހަށިގަނޑު ފެނިފައިވަނީ އޭނާގެ ގެއާއި 500 މީޓަރު ދުރުގައި ހުންނަ ދަނޑަކުންނެވެ.

މިއަހަރުގެ އޭޕްރިލް މަހުން ފެށިގެން ނޭޕާލުގެ ބޯޑަރު ކައރީގައިވާ ބަހްރެއިޗް ސިޓީގެ 30 އަވަށަކަށް ހިޔަޅުތަކުގެ ހަމަލާ އަމާޒުވެފައިވާއިރު، މި ހަމަލާތަކުގައި 34 މީހުން ވަނީ ޒަހަމް ވެފައެވެ.

 އޮތޯރިޓީތަކުން ވަނީ ޑްރޯން އާއި ކެމެރާ ބޭނުންކޮށް, މި ހިޔަޅުތައް ބިރުގެންނެވުމަށް މަސައްކަތްކޮށްފައެވެ. މި މަސައްކަތުގެ ތެރެއިން މިހާތަނަށް ތިން ހިޔަޅު ހިފައި، ޖަނަވާރު ބަގީޗާތަކަށް ވަނީ ގެންގޮސްފައެވެ.