މިރެޔަކީ އިރުގެ ޢާއިލާގެ ދެވަނައަށް އެންމެ ބޮޑު ޕްލެނެޓް ޒުޙަލް (ސެޓަން) ވަރަށް ރީތިކޮށް ފެންނާނެ ރެޔެއް ކަމަށް ފަލަކީ ހިސާބުތަކުން ދައްކައިފިއެވެ.

އެގޮތުން ސެޓަން އަރާ ގަޑިއަކީ މިރޭ 20:14 ކަމަށްވާއިރު އޮއްސޭނީ މާދަމާ  ހެނދުނު 06:37ގައި ކަމަށް ފަލަކީ ހިސާބުތަކުން ލަފާކުރެއެވެ. މިހެންކަމުން، މިރޭ ގާތްގަނޑަކަށް 10 ގަޑިއިރާއި 23 މިނެޓު ވަންދެން ސެޓަން ޕްލެނެޓް އުޑުމަތީގައި ފެންނަން ހުންނާނެއެވެ.

ޒުޙަލް ޕްލެނެޓަކީ އިރުގެ ޢާއިލާގެ ހަވަނަ ޕްލެނެޓެވެ. އަދި މުޝްތަރީ ޕްލެނެޓަށްފަހު ދެވަނައަށް އެންމެ ބޮޑު ޕްލެނެޓެވެ. މި ޕްލެނެޓް ފާހަގަކޮށްލެވެނީ އޭގެ ވަށައިގެން ހުންނަ ރިންގުތަކުންނެވެ.

މިރޭ އަދި މާދަމާ ރޭ ވަނީ ސީލިގަރ އިފެކްޓް ކިޔާ ޚާއްޞަ ކަމެއް ފެނުމުގެ ފުރުޞަތު އޮވެއެވެ. މި އިފެކްޓުގެ ސަބަބުން ސެޓަންގެ ރިންގުތައް ވަގުތީގޮތުން އިތުރަށް އަލިވެއެވެ.

މިކަން ހިނގަނީ އިރާއި، ބިމާއި، ސެޓަން އެއް ސީދާ ރޮނގެއްގައި ޖެހޭއިރު، ރިންގުތަކުގެ ބައިތަކުގެ ހިޔަނި އަހަރުމެންނަށް ނުފެންނަ ގޮތަށް ވަގުތީގޮތުން "ފޮރުވޭ"ތީއެވެ. މީގެ އިތުރުން، ރިންގުތަކުގެ ބައިތަކުން އިރުގެ އަލި ބިމާ ދިމާލަށް އަނބުރާ ޖެހޭތީވެސް ރިންގުތައް އިތުރަށް އަލިވެއެވެ.

އެހެންކަމުން، ފަލަކީ ކަންކަމަށް ޝައުޤުވެރިވާ ފަރާތްތަކަށް މިރޭ ސެޓަން ޕްލެނެޓް ބެލުމަކީ ރަނގަޅު ފުރުޞަތެއް ކަމަށް ފަލަކީ މާހިރުން ލަފާދެއެވެ. އަދި މި ޕްލެނެޓް ރަނގަޅަށް ފެންނާނީ އަލިކަން ކުޑަ ސަރަޙައްދުތަކުން ކަމަށްވެސް ބުނެއެވެ.