ހައިކޯޓް އަދި ސުޕްރީމް ކޯޓަށް ދާނެކަމަށް ބުނެ ޕީޕީއެމް އިން ނޫސްބަޔާނެއް ނެރެފިއެވެ.
ޕީޕީއެމްގެ މިއަދު ނެރުނު ނޫސް ބަޔާނުގައި ބުނެފައިވަނީ ނިމި ދިޔަ ރިޔާސީ އިންތިހާބު ހިނގަމުން ދިޔައިރު ކުރިމަތިވި ތަފާތު މައްސަލަތަކާ ގުޅޭގޮތުން އޮބްޒަރވަރުން، މޮނީޓަރުން، އަދި އާންމުންގެ ފަރާތުން އެ ޕާޓީއަށް ވަރަށް ގިނަ އަދަދެއްގެ ޝަކުވާތަކެއް ލިބިފައިވާކަމަށެވެ.
އެގޮތުން ވޯޓު ކަރުދާސް ޗާޕުކުރުމުން ފެށިގެން ގޮސް ވޯޓުލުމުގެ މަރުހަލާގައި އޮޅުވާލުންތަކާއި މަކަރާއި ހީލަތް ހިމެނުން އަދި ގާނޫނު އަސާސީއާއި ހިލާފު ތަފާތު އާލާތްތައް ބޭނުން ކޮށްގެން ލެވޭ ވޯޓުގެ އިތުރުން ނަތީޖާއަށް އުނި އިތުރު ގެންނަން މަސައްކަތްކުރުން ފަދަ ގިނަ މައްސަލަތަކެއް މި ނޫސްބަޔާނުގައި ވަނީ ފާހަގަކޮށްފައެވެ.
ހުރިހާ ޝަކުވާތަކެއް ރިއާޔަތް ކުރުމަށްފަހު އެ ޕާޓީގެ ފަރާތުން އިންތިހާބުގައި ވާދަކުރެއްވި ބޭފުޅުންގެ ހައްގު ގެއްލިފައިވާ ކަމަށް ގަބޫލު ކުރެވޭ ކަމަށާއި އިންތިހާބާގުޅޭ މިބާވަތުގެ މައްސަލަތައް ކަމާބެހޭ ފަރާތްތަކަށް ހުށަހެޅުމަކީ ކޮންމެހެންވެސް ކުރަންޖެހޭ ކަމެއްކަމުގައި އެ ޕާޓީއިން ގަބޫލު ކުރާކަމައްވެސް އެ ބަޔާނުގައި ވެއެވެ.
ފުލުހުންގެ އިދާރާއަށް އެ މައްސަލަތައް ހުށަހަޅާ، ފުލުހުން ދީފައިވާ ޖަވާބަށް ރިއާޔަތްކޮށް ޕީޕީއެމްގެ ރިޔާސީ ކެނޑިޑޭޓް އަދި ރަނިގް މޭޓްގެ އިންތިހާބީ ހައްގު ހޯދުމަށްޓަކައި ރާއްޖޭގެ ހައިކޯޓަށާއި ސުޕްރީމް ކޯޓަށް އެ ހުރިހާ މައްސަލަތަކެއް ހުށަހަޅާނެ ކަމަށް ޕީޕީއެމްގެ މި ނޫސްބަޔާނުގައިވަނީ ހާމަކޮށްފައެވެ.
Advertisement
This content is created and paid for by advertisers and does not involve Voice Journalists
