ނ.އަތޮޅު ހޮޅުދޫގައި ޒަހަމްތަކަކާއެކު މަރުވެފައި އޮއްވާ ފެނުނު ޒަކިއްޔާ މޫސާގެ މަރުގެ މައްސަލަ ތަހުގީގުކުރުމަށް ފުލުހުންގެ ހާއްސަ ޓީމެއް އެރަށަށް ފުރައިފިއެވެ.
އުމުރުން 50 އަހަރުގެ ޒަކިއްޔާ ޒަޚަމްތަކާއެކު މަރުވެފައި އޮއްވާ ފެނިފައިވަނީ މިއަދު ހެނދުނުގެ ވަގުތެއްގެ ތެރޭގައެވެ.
ފުލުހުންގެ ހާއްސަ ޓީމެއް ހޮޅުދުއަށް ދިއުމަށް ފުރާފައިވާއިރު، ފުލުހުންގެ ފޮރިންސިކް ޓީމެއް މިހާރުވެސް އެރަށުގައި ހަރަކާތްތެރިވަމުން އަންނަކަމަށް ވޮއިސްއަށް ވަނީ މައުލޫމާތު ލިބިފައެވެ.
ފުލުހުން ހާމަކޮށްފައިވާ މައުލޫމާތުތަކަށް ބަލާއިރު، ޒަކިއްޔާ މަރުގެ މައްސަލަ، އެ އިދާރާއަށް ރިޕޯޓު ކޮށްފައިވަނީ މިއަދު ހެނދުނު 10:10 ގައެވެ. މަރުގެ ރިޕޯޓް ލިބުމާ ގުޅިގެން ފުލުހުން ވަނީ އެތަނަށްގޮސް، އަންހެންމީހާގެ ހަށިގަނޑު އެ ރަށު ހެލްތު ސެންޓަރަށް ގެންގޮސްފައެވެ.
މަރުވި ޒަކިއްޔާގެ ފިރިއަކާއި ދެ ކުދިން ތިބެއެވެ. މިހާތަނަށް އެ އެންމެންވެސް ދިރިއުޅެމުންދަނީ ޒަކިއްޔާ އާ އެއް ގެއެއްގައެވެ.
ވޮއިސް އާ ވާހަކަދެއްކި އެ ރަށުގެ މީހަކު ބުނީ، ޒަކިއްޔާއަކީ ޑިޕްރެޝަނުގެ މައްސަލަ ހުންނަ މީހެއް ކަމަށާއި، ބައްޔަށް ބޭސް ބޭނުންކުރަމުން އަންނަ ކަމަށެވެ. ނަމަވެސް މިކަން ރަސްމީ އެއްވެސް އިދާރާއަކުން މިހާތަނަށް ކަށަވަރުކޮށްދީފައެއް ނުވެއެވެ.
Advertisement
This content is created and paid for by advertisers and does not involve Voice Journalists
