ސޯޝަލް މީޑިއާ އެކްޓިވިސްޓް ތައްޔިބު ޝަހީމްގެ ފޯނާއި އިލެކްޓްރޯނިކް ސާމާނު ފުލުހުންގެ ބެލުމުގެ ދަށަށް މިއަދު ގެންގޮސްފި އެވެ.

މިކަމާ ގުޅިގެން ފުލުހުން ބުނީ، މިތަކެތި ހިފަހައްޓާފައިވަނީ އެ މައްސަލައިގެ ތަހުގީގު ބޭނުމަށް ކޯޓު އަމުރެއްގެ ދަށުންނެވެ.

އެނގިފައިވާ ގޮތުގައި، ތައްޔިބްގެ ފޯނާއި ލެޕްޓޮޕާއި ހާޑްރައިވަކާއި ފަސް ޕެންޑްރައިވް ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ.

Advertisement

ތައްޔިބު ގެންގުޅޭ ފޯނާއިން އެނޫންވެސް ތަކެތި ފުލުހުން ހިފަހައްޓާފައިވާއިރު، ރައީސް ޔާމީނު ހައްޔަރުކުރުމަށް ސައްހަ ނޫން ކޯޓު އަމުރެއް ނެރުނު މައްސަލައާ ގުޅޭގޮތުން ފުލުހުން ކޮށްފައިވާ ތަހުގީގެއްކަމަށް ބުނެ މީސްމީޑިއާގައި އަސްލެއްނެތް ބަޔާނެއް ދައުރުކުރި މައްސަލައެއް ފުލުހުން އަންނަނީ ބަލަމުންނެވެ.

ފުލުހުންގެ ރިޕޯޓެއްކަމަށް ބުނެ ނެރެފައިވާ އެ ބަޔާނާ ގުޅޭގޮތުން ފުލުހުން ބުނެފައިވަނީ، އެ ބަޔާނުގައި ބޭނުންކޮށްފައިވާ ލެޓަ ހެޑަކީ ފުލުހުން ބޭނުންކުރަމުންދާ ލެޓާހެޑާ ތަފާތު އަދި ސޮއިކޮށްފައިވަނީވެސް ފޯޖުކޮށްގެން ކަމަށެވެ.

ބަޔާނުގެ މައްސަލާގައި ތައްޔިބުގެ ފޯނު ހިފަހައްޓާފައިވާއިރު، އެމްޑީޕީ ސަރުކާރު ދުވަސްވަރު ޓޫރިޒަމް މިނިސްޓްރީގެ ސިޔާސީ މަގާމެއްގައި ހުރި ތައްޔިބު މި ސަރުކާރު ފެށުނުއިރު އޭނާ ހުރީ ސްޓެލްކޯ ވަޒީފާއެއްގައެވެ. ނަމަވެސް ފަހުން އޭނާ މަޤާމު ގެއްލުމާއެކު ފެނިގެންދިޔައީ ސަރުކާރަށް ފާޑުކިޔާ މީހެއްގެ ގޮތުގައެވެ.