ދިވެހިރާއްޖެއަށް ކުރިމަތިވެފައިވާ މާލީ މައްސަލަތަކުން އަރައިގަތުމަށް އިންޑިއާއިން އެހީވުމަށް ތައްޔާރަށް އޮތްކަމަށް އެޤައުމުގެ ނޫސްތަކުން ބުނެފިއެވެ.

އިންޑިއާގެ ނޫސްތަކާ ހަވާލާދީ އެޤައުމުގެ ސަރުކާރުގެ ބައެއް އޮފިޝަލުން ވިދާޅުވެފައިވަނީ، ރާއްޖެއަށް ކުރިމަތިވެފައިވާ ދަރަނީގެ ހާލަތުން އަރައިގަތުމަށް އިންޑިއާގެ ބޭންކުތައް މެދުވެރިކޮށް އެހީވެދިނުމަށް ތައްޔާރަށް ތިބި ކަމަށެވެ.

މިގޮތުން ރިޒާވް ބޭންކް އޮފް އިންޑިއާގެ ކަރަންސީ ސްވޮޕް ޕްރޮގްރާމުގެ ދަށުން 400 މިލިއަން ޑޮލަރު ލިބުމުގެ ފުރުސަތު އޮތްކަމަށް މީޑިއާތަކުން ވަނީ ފާހަގަކޮށްފައެވެ. މީގެ އިތުރުން ރައީސް ސޯލިހުގެ ވެރިކަމުގައި ސޮއިކޮށްފައިވާ 800 މިލިއަން ޑޮލަރުގެ ލައިން އޮފް ކްރެޑިޓް އެއްބަސްވުމުގެ ދަށުންވެސް މާލީ އެހީ ހޯދުމުގެ ފުރުސަތު އެބައޮތް ކަމަށެވެ.

Advertisement

އިންޑިއާގެ ބައެއް މީޑިއާތަކުން ބުނީ ރައީސް ޑރ.މުއިއްޒު އިންޑިއާއަށް ކުރެއްވުމަށް ހަމަޖެހިފައިވާ ރަސްމީ ދަތުރުފުޅުގައި އެކަން ކުރިއަށް ގެންދިއުމަށް މަޝްވަރާ ކުރުމުގެ ފުރުސަތު އެބައޮތް ކަމަށެވެ. އިންޑިއާގެ ނޫސްތަކުން މިގޮތަށް ރިޕޯޓްކުރިނަމަވެސް ސަރުކާރުގެ ކަމާގުޅޭ އެއްވެސް ވުޒާރާއަކުން އަދި މިހާތަނަށް މިކަމާ ގުޅޭގޮތުން އެއްޗެއް ބުނެފައެއް ނުވެއެވެ. ސަރުކާރުން މިދިޔަ ހަފްތާގައި ވަނީ ރައީސް ޑރ.މުއިއްޒު އިންޑިއާއަށް ރަސްމީ ދަތުރުފުޅެއް ކުރައްވާނޭކަމަށް ބުނެފައެވެ.

ރާއްޖެއަށް ކުރިމަތިވެފައިވާ މާލީ މައްސަލަތަކުން އަރައިގަތުމަށް އިންޑިއާއިން އެހީވުމަށް ތައްޔާރަށް އޮތްކަމަށް އެޤައުމުން ބުނެފައިމިވަނީ ޗައިނާ އާއި ރާއްޖެއާ ދެމެދު ކަރަންސީ އެގްރިމެންޓެއްގައި ސޮއިކޮށްފައިވަނިކޮށެވެ.