ސްރީ ލަންކާގެ އައު ރައީސް، އަނުރާ ކުމާރާ ދިސަނަޔަކަ، ރައީސްކަމުގެ ހުވާ ކުރައްވައިފިއެވެ.

ލަންކާގެ އިންތިހާބުގެ ދެވަނަ ބުރަކަށް ދިޔުމުން، ދިސަނަޔަކަ ކާމިޔާބު ކޮށްފައިވަނީ, ފުރަތަމަ ބުރުގައި އެއްވެސް ކެންޑިޑޭޓަކަށް ޖުމްލަ ވޯޓުގެ 50 އިންސައްތައަށްވުރެ ގިނައިން ވޯޓު ނުލިބުނު ސަބަބުންނެވެ.

ރައީސްކަމަށް ދެވަނަ އަދި ތިންވަނައަށް ދީފައިވާ ވޯޓުތައް ގުނުމަށްފަހު، ލަންކާގެ އިލެކްޝަންސް ކޮމިޝަނުން ބުނި ގޮތުގައި ދިސަނަޔަކަ ވަނީ ޖުމްލަ 5،740،179 ވޯޓާއެކު އިންތިހާބު ކާމިޔާބު ކޮށްފައެވެ.

އިދިކޮޅު ފަރާތުގެ ލީޑަރު ސަޖިތު ޕްރެމަދާސާ ދެވަނައަށް އައީ 4،530،902 ވޯޓާ އެކުގައެވެ. ކުރިން ރައީސް ކަމުގެ މަގާމުގައި ހުންނެވި ރަނިލް ވިކްރަމަސިންގެއަށް ފުރަތަމަ ބުރުގައި 2،299،767 ވޯޓު ލިބުމާއި ގުޅިގެން އޭނާ ވަނީ ދެވަނަ ބުރުން ވަކިވެފައެވެ.

ދިސަނަޔަކަ ވަނީ ލަންކާއަށް ދިމާވެފައިވާ އިޤްތިޞާދީ ހީނަރުކަމުން އަރައިގަނެ، ތާރީޚް އަލުން ލިޔުމަށް ވަޢުދުވެވަޑައިގެންފައެވެ.

ރައީސްކަމުގެ ހުވާކުރުމުގެ ކުރިން ދެއްވި ބަޔާނެއްގައި، 55 އަހަރުގެ އޭކޭޑީ ގެ ނަމުންވެސް މަޝްހޫރު ދިސަނަޔަކަ ވިދާޅުވީ މި ކާމިޔާބީއަކީ  އެންމެންގެ ވެސް ކާމިޔާބީއެއް ކަމަށާއި، ސްރީލަންކާ މިހާރު ވަނީ އާ ފެށުމެއްގައި ކަމަށެވެ.

ހަމައެއާއިއެކު، ކެމްޕޭނުގެ ތެރޭގައި، ދިސަނަޔަކަ ވަނީ ހަރުދަނާ ކޮރަޕްޝަން ހުއްޓުވުމުގެ ފިޔަވަޅުތަކެއް ގެ އިތުރުން، ސްރީލަންކާގެ މެނުފެކްޗަރިންގ، ދަނޑުވެރިކަމާއި އައި.ޓީ ދާއިރާ ތަރައްޤީކުރުމަށް ވަޢުދުވެފައެވެ. އަދި އިންޓަނޭޝަނަލް މަނިޓަރީ ފަންޑް (އައި.އެމް.އެފް) އާއެކު ސްރީލަންކާގެ އިޤްތިޞާދީ ހާލަތުން އަރައިގަތުމަށް ވެފައިވާ އެއްބަސްވުން ކުރިއަށް ގެންދިއުމަށާއި، އޭގެ ހަރުކަށި ފިޔަވަޅުތަކުކުގެ އަސަރު ޤައުމުގެ އެންމެ ނިކަމެތިންނަށް ކުޑަކުރުމަށްވެސް އެއްބަސްވެފައެވެ.